თითოეული ადამიანისთვის საყვარელი პროფესია, ყოველდღიური საქმიანობა სირთულეებსა და წინააღმდეგობებთან არის დაკავშირებული. ჩვენ ვსწავლობთ, ვეძებთ, ვინტერესდებით და, საკმარისი მონდომების შემთხვევაში, ვიღებთ სასურველ შედეგს. განსაკუთრებულად სასიამოვნოა, როდესაც მიზნის მისაღწევად მხოლოდ საკუთარ უნარებსა და შრომას ვეყრდნობით.
ნინო მჭედლიშვილი თვითნასწავლი ხელოვანია. სხვადასხვა მეთოდით, მან შეძლო და შეიძინა ის უნარები, რაც საოცარი და, შეიძლება ითქვას, დაუჯერებელი ნამუშევრების შექმნაში დაეხმარა. დეტალურად, ის „თბილისი თაიმსს“ ესაუბრა.
ნამუშევრებს რა ჟანრში ქმნით?
ბავშვობიდან ვხატავდი, თუმცა, აქტიურად ხატვა და შეკვეთებით მუშაობა დავიწყე 2012 წლიდან. ჩემი ნამუშევრები უფრო ფოტო რეალიზმის მიმართულებას მიეკუთვნება, თუმცა ვცდილობ, მხოლოდ ამ სტილში არ ვხატო და სხვადასხვა ტექნიკის გამოყენებით შევქმნა ნამუშევრები, მაგალითად – მასტეხინით, შერეული ტექნიკით, უფრო მხატვრულად ფასეული ნახევრად წარმოსახვითი სიუჟეტებით და აბსტრაქციაც.
ძირითადად, ვმუშაობ ტილოზე ზეთის საღებავით, თუმცა – ზოგჯერ გრაფიკაშიც.
ვიზუალის მხრივ, რა მახასიათებლები აერთიანებს თქვენს ნამუშევრებს?
ჩემს ნამუშევრებს უფრო აერთიანებს ვიზუალური ესთეტიკა. სიღრმისეული ნამუშევარი მხოლოდ რამდენიმე შემიქმნია, რადგან ჩემი შემოსავლის წყარო ძირითადად შეკვეთებია, დრო არ მრჩება – საკუთარი ჩანაფიქრი ხშირად გადავიტანო ტილოზე. უმეტესად, მიწევს კომერციულად გაყიდვად თემებზე მუშაობა.
რა სირთულეებთან არის დაკავშირებული, როცა ხელოვანი თვითნასწავლია?
თვითნასწავლისთვის ბევრად მეტი წელია საჭირო, რომ შეისწავლოს ხატვის სხვადასხვა ტექნიკა, ნაკლები შეცდომა დაუშვას. თავიდანვე ასე არ ვხატავდი, პრაქტიკამ, სხვა მხატვრების ნამუშევრების დაკვირვებამ, შენიშვნებმა გამზარდა, უფრო დაიხვეწა ნახატებიც, თუმცა, ამ დონეზე გაჩერებას არ ვაპირებ, საკუთარ თავზე კიდევ ბევრი მუშაობა მჭირდება, რომ თვითგანვითარება შევძლო და ოდესმე პერსონალური გამოფენა გავაკეთო – უკვე ჩემი შინაგანი სამყაროს ტილოზე გადმოტანილი ნახატებით და არამხოლოდ ვიზუალური ესთეტიკით ფასეული სიუჟეტებით დატვირთული ნახატებით.
ზოგჯერ არ მიჯერებენ, რომ არ მაქვს აკადემიური ცოდნა მიღებული. სხვა მხრივ, სირთულე არ შემქმნია თვითნასწავლობის გამო.
3 D ნამუშევრებსაც ქმნით – აღნიშნული როგორ შეოპსწავლეთ?
რაც შეეხება ჩემს 3D ეფექტის ნამუშევრებს, ეს მიმართულება პირველად ვნახე გერმანიაში მოღვაწე ქართველი მხატვრის, ეკა ფერაძის შემოქმედებაში. იმდენად მომწონდა, რომ ასე დაკვირვებით ვეცადე, თვითონაც შემექმნა მსგავსი, მაგრამ არა – ანალოგი. ჩემი ხედვით და სტილით ვცილობ, გამოირჩეოდეს და მგონი, გამომდის. მე არ ვხატავ 3D -ში, არამედ ეს არის სამგანზომილებიანის ეფექტი, რომელიც ყოველი მხრიდან ერთნაირად ჩანს და არ სჭირდება მხოლოდ ერთი რაკურსით შეხედვა, რაც სამგანზომილებიანი ნახატებისთვისაა დამახასიათებელი.
გარდა ამისა, ხელოვნების სხვა მიმართულებებით თუ ხართ დაინტერესებული?
ხატვის გარდა მომწონს ძერწვა ცივი ფაიფურით, სამკაულების კეთება პოლიმერული თიხით, ეს ტექნიკებიც ინტერნეტში მრავლად არსებული ვიდეომასალით შევისწავლე. სამომავლოდ შემოგთავაზებთ განსხვავებულ ნამუშევრებსაც, მაქვს რაღაც ჩანაფიქრი და იმედია, გამომივა.
