ქართული გემოები, კულინარიული ექსპერიმენტები, ტრადიციული კერძები არა მხოლოდ ქართველებისთვის არის საოცარი, არამედ – უცხოელებისთვისაც. ყველასთვის თანაბრად საინტერესოა მათი ისტორიები, საიდუმლო ამბები… განსაკუთრებულად გემრიელი კი ის დეტალებია, რაც საიდუმლო რეცეპტებს შეიცავს – ბებიების მიერ შენახულს.
ამიდა ახალაია აფხაზეთიდან, კერძოდ – გალიდან არის. ის აჯიკას აწარმოებს, რომელიც სხვების მიერ დამზადებულისგან აშკარად გამორჩეულია. ყიდის სახლიდან, აქვს ონლაინ მომსახურება. არცთუ ისე დიდი ხანია, ის ამ საქმიანობით არის დაკავებული, თუმცა, მისი პროდუქტის მიმართ ინტერესი მუდმივად მზარდია. ამიდა „თბილისი თაიმსს“ ესაუბრა.
როგორ გაიცნო მომხმარებელმა თქვენი პროდუქტი?
6 წლის მანძილზე ვაწარმოებდი და ვყიდდი აფხაზურ აჯიკას, ვყიდდი ემიგრაციაში, ადგილობრივ ბაზართან შეხება არ მქონია. ერთი წელია, რაც დავიწყე ადგილობრივ ბაზარზე გაყიდვა და პირველი, სადაც მონაწილეობა მივიღე, იყო ღვინის ფესტივალი ზუგდიდში, 2022 წლის ოქტომბერში. აქ ჩემმა პროდუქტმა ძალიან დიდი მოწონება დაიმსახურა. ამჯერად, ვაწარმოებ ძალიან ბევრი სახეობის აჯიკას.
რა გამოარჩევს მას, რის გამოც მომხმარებელთა რიცხვი მზარდია?
მონაწილეობას ვიღებ სხვადასხვა გამოფენა-გაყიდვაში, განსაკუთრებით – ჩვენს რეგიონში. გამორჩეულად საინტერესო და უცხოა ჩემი აჯიკა ტურისტებისთვის და მათ ის ძალიან მოსწონთ – ეს იმიტომ, რომ ძალიან კარგი ხარისხისაა და გემოვნური თვისებებიც საინტერესოა. პლუს, ვიყენებ ოჯახურ რეცეპტს, რაც არსებულთან შედარებით განსხვავებულ გემოს სძენს და ასე ვიპყრობთ მომხმარებლის გულს. ისინი უკან ბრუნდებიან. ჩემთვის ძალიან ბევრს ნიშნავს, როდესაც კმაყოფილი მომხმარებელი კვლავ მიკავშირდება შესაძენად.
რას შეიცავს თქვენ მიერ დამზადებული აჯიკა?
ჩემი პროდუქტი აბსოლუტურად ნატურალურია. ნედლეულს თავად ვაწარმოებთ, ვიყენებთ ადგილობრივ ბაზარზე არსებულ სანელებლებს და წიწაკებს. ნდობის ფაქტორი მაღალია. განსხვავებულ გემოვნურ თვისებებს კი ოჯახის, ბებიის საიდუმლო რეცეპტი განაპირობებს. განსაკუთრებით, აფხაზურ აჯიკას აქვს ეს დანამატი.
თუ გეგმავთ, კიდევ სხვა პროდუქტი შესთავაზოთ მომხმარებელს?
დღესდღეობით, ვამზადებს აჯიკას და სხვადასხვა სანელებელს, მაგრამ ვაპირებ ტკბილი ჯემების დამატებას, რადგან არსებობს მოთხოვნა და ჩემი მეგობრებიც სულ მეუბნებიან. რომ დავამზადო წიწაკის მურაბებიც. როგორც წესი, მეწარმე უნდა ფიქრობდეს განვითარებაზე და ყოველთვის ამატებდეს სიახლეებს. ახლა სწორედ იმ ეტაპზე ვარ, რომ ვფიქრობ, აჯიკებისა და წიწაკების ტკბილი მიმართულებას დავამატო.
