“შესაძლოა, საბრძოლო მოქმედებების არეალი გაფართოვდეს და ჩვენ, პირდაპირ არა, მაგრამ ირიბად აღმოვჩნდეთ ჩართულები კონფლიქტში. მიუხედავად იმისა, რომ სომხეთ-აზერბაიჯანის ფრონტზე, ჯერჯერობით, სიმშვიდეა, ეს არ არის იმის მანიშვენებელი, რომ იქ საბოლოო მშვიდობა დამყარდა. გარდა ამისა, ჩვენ არ ვიცით, როგორ დასრულდება უკრაინაში მიმდინარე ომი. ამაზეა დამოკიდებული ისიც, რუსეთის მხრიდან მოხდება თუ არა საქართველოზე რაიმე ფორმის, სამხედრო მოქმედებები.”, – ამის შესახებ ანალიტიკოსმა, ზაალ ანჯაფარიძემ “თბილისი თაიმსთან” საუბრისას განაცხადა.
“ყველაფერს რომ თავი დავანებოთ, მსოფლიოში მიმდინარე რყევები – მოსალოდნელი კონფლიქტები, რომლებმაც შესაძლოა, იფეთქოს, საქართველოზეც იმოქმედებს იმდენად, რამდენადაც ეს ყველაფერი აისახება მსოფლიო ეკონომიკაზე. ჩვენ ჩართულები ვართ მსოფლიო ეკონომიკურ და სამეურნეო პროცესებში.
მიუხედავად იმისა, რომ ჩვენ, სამშვიდობო პოლიტიკის წყალობით, ასე თუ ისე, ვახერხებთ მშვიდობის შენარჩუნებას, ეს მშვიდობა ჯერჯერობით ძალიან მყიფეა”, – აღნიშნა ანალიტიკოსმა და, მიმდინარე სამხედრო დაპირისპირებების ჭრილში, ხელისუფლების პოზიცია შეაფასა.
“ჩვენს ხელისუფლებას უწევს
დანის პირზე“ სიარული. ერთი მხრივ, მისგან ითხოვენ, გაატაროს ის პოლიტიკა, რომელიც სრულ შესაბამისობაშია ევროკავშირის საგარეო პოლიტიკასთან – ამისკენ მუდმივად არის მოწოდებები, რომ საქართველო იყოს უფრო აქტიური უკრაინასთან მიმართებით. მეორე მხრივ, ჩვენ არ გვაძლევენ დაცულობის იმ გარანტიებს, რაც ქვეყანას აუცილებლად სჭირდება. ეს არის ერთერთი მთავარი, განხეთქილების მიზეზი საქართველოსა და დასავლელ პარტნიორებს შორის. ჩვენგან ითხოვენ აქტიურ მოქმედებებს ფრონტზე, მაგრამ არ გვაძლევენ იმის გარანტიებს, როგორ ვიქნებით დაცულები რუსეთის აგრესიის შემთხვევაში, რის ალბათობაც საკმაოდ მაღალია.
საქართველომ, სამშვიდობო პოლიტიკის წარმოებით, გააკეთა მძიმე და მტკივნეული არჩევანი ღირებულებაზე დაფუძნებულ პოლიტიკასა და გადარჩენის პოლიტიკას შორის – ჩვენმა ხელისუფლებამ აირჩია გადარჩენის პოლიტიკა”, – განაცხადა ზაალ ანჯაფარიძემ.
