რამდენიმე დღის წინ ცნობილი გახდა, რომ ევროკომისიამ გასცა რეკომენდაცია – საქართველოს კანდიდატის სტატუსი მიენიჭოს. აღნიშნულ საკითხს „თბილისი თაიმსთან“ საუბრისას ანალიტიკოსი, ზაალ ანჯაფარიძე გამოეხმაურა.
როგორც ანჯაფარიძემ აღნიშნა, ამ გადაწყვეტილების მთავარი პრივილეგია არის ის, რომ დაიწყება მოლაპარაკებები კანდიდატის სტატუსიდან ევროკავშირის წევრობამდე.
„მთავარი პრივილეგია ის არის, რომ ეს ხსნის ახალ ეტაპს, რათა დაიწყოს მოლაპარაკებები სტატუსიდან უკვე ევროკავშირის წევრობამდე – რა ეტაპზეც ახლა უკრაინა და მოლდოვა იმყოფებიან. თუ საქართველომ მიიღო ეს საშუალება, რომ ევროკავშირის წევრობაზე დაიწყოს მოლაპარაკებები – თუნდაც ამას რამდენიმე წელი დასჭირდეს, ეს უკვე, თავისთავად, სერიოზული მიღწევაა“, – ამბობს ანალიტიკოსი.
როგორც ანჯაფარიძე აღნიშნავს, უკრაინაში ომის დაწყებამდე, შესაძლებლობის ფანჯარა არ არსებობდა.
„უფრო ფართო კონტექსტში რომ განვიხილოთ – ვიდრე უკრაინის ომი დაიწყებოდა, ფაქტობრივად, შესაძლებლობის ფანჯარა არ არსებობდა. მეორე – ჩვენ გვეკისრება ვალდებულებები, რომ მოვიყვანოთ ჩვენი ქვეყნის პოლიტიკური ცხოვრება და კანონმდებლობა ევროკავშირთან თანხვედრაში. თუმცა, აქ ვიტყვი, რომ ის ვალდებულებები, რაც ჩვენ ევროკავშირმა დაგვაკისრა, ცოტა არ იყოს, სცდება ამ ამოცანას და სხვა პოლიტიკური დატვირთვა აქვს, მაგრამ, ყოველ შემთხვევაში, ერთი ნაბიჯი გადავდგით წინ. გარდა ამისა, ფინანსურ განზომილებაში რომ განვიხილოთ, ჩვენ გვექნება წვდომა უფრო მეტ დაფინანსებაზე ევროკავშირიდან“, – განმარტა ზაალ ანჯაფარიძემ.
