24 ოქტომბერს, სამტრედია-აბაშის გზაზე მომხდარი ავარიის შედეგად დაშავებული ლიკა კუჭუხიძის ჯანმრთელობის მდგომარეობის შესახებ გავრცელებულ ინფორმაციას მისი მამა გამოეხმაურა.
‘’ჭორები ვრცელდება, ვინ რას წერს, ვინ რას ავრცელებს… ათასნაირ ჭორს ვკითხულობ, რაც ძალიან ცუდად მოქმედებს ოჯახის წევრებზე, ნათესაობაზე. სიმართლე გითხრათ, ძალიან მძიმედ არის, ძალიან კრიტიკულ მდგომარეობაშია ჩემი ქალიშვილი დღესდღეობითაც, ის ებრძვის სიკვდილს, ექიმები იმედს გვაძლევენ, გვეუბნებიან, რომ ყველაფერი კარგად იქნება.
ლიკა კონტაქტური არ არის ჯერჯერობით, იმიტომ, რომ სჭირდება რაღაც პერიოდი ხელოვნურ ძილში ყოფნა, რადგან ძალიან დაზიანებული აქვს შინაგანი ორგანოები, არ ვიცი რომელი ერთი ჩამოვთვალო, ისეთი დიდი ტრავმები აქვს მიღებული, დრო სჭირდება მდგომარეობიდან, რომ გამოვიდეს ადამიანი. ახლა გვაქვს კიდევ ოთხი, ხუთი დღე ძალიან კრიტიკული და ამ კრიტიკულ დღეებს აუცილებლად გადალახავს ჩემი შვილი, მე მჯერა ამის, ჩემი შვილი ძლიერი ადამიანია და მწამს უფლის, მთელი საქართველო ლოცულობს ჩვენთან ერთად. მინდა ყველას დიდი მადლობა ვუთხრა, მინდა ყველას უფალმა უბოძოს ყველაფერი კარგი, ღმერთმა გაახაროს და გააძლიეროს თითოეული მათგანი.
თქვენ არ იცით, როგორი დიდი იმედი და ძალა ხართ ჩვენთვის.’’ – ამბობს ლიკას მამა.
ცნობისთვის, ავტოსაგზაო შემთხვევა სამტრედია-აბაშის გზაზე 24 ოქტომბერს მოხდა. დაშავებული ლიკა კუჭუხიძის მდგომარეობას საზოგადოების მხრიდან დიდი ყურადღება და მხარდაჭერა მოჰყვა.
შეგახსენებთ, ავტომობილში ლიკა კუჭუხიძესთან ერთად იმყოფებოდა მისი მეუღლე, 19 წლის ბაჩო ლასარეიშვილი, რომელიც კლინიკაში გარდაიცვალა.
