ევროკავშირის უმაღლესი წარმომადგენელი საგარეო ურთიერთობებისა და უსაფრთხოების საკითხებში, ქეთრინ ეშტონი მომდევნო კვირას კიევში გაემგზავრება. ამის შესახებ ბრიუსელში გამართულ პრესკონფერენციაზე ევროკომისიის წარმომადგენელმა ოლივიე ბაილიმ განაცხადა. მისი თქმით, ეშტონი შეეცდება ქვეყანას პოლიტიკური კრიზისის დაძლევაში დაეხმაროს.
როგორც ოლივიე ბაილიმ აღნიშნა, ეშტონის ვიზიტის შესახებ ინფორმაცია ევროკომისიის პრეზიდენტმა, ჟოზე მანუელ ბაროზომ უკრაინის პრეზიდენტს სატელეფონო საუბრის დროს მიაწოდა.
როგორც ბრიუსელში აღნიშნავენ, კიევს ასევე ეწვევა ევროკომისარი გაფართოებისა და ევროპული სამეზობლო პოლიტიკის საკითხებში შტეფან ფულე. მისი ვიზიტი უკრაინაში 24-25 იანვარს არის დაგეგმილი.
“პრეზიდენტმა იანუკოვიჩმა განაცხადა, რომ მიესალმება როგორც ეშტონის, ასევე შტეფან ფულეს ვიზიტს”, – განაცხადა ევროკომისიის წარმომადგენელმა.
23.01.14
