უკრაინაში ვითარება უკონტროლო ხდება. კიევში ოპოზიციის მომხრეებმა იუსტიციის სამინისტრო დაიკავეს. შენობას ახლა ისინი აკონტროლებენ.
სამინისტროს გათავისუფლება სთხოვა აქტივისტებს ვიტალი კლიჩკომ, თუმცა დემონსტრანტებმა მას უარით უპასუხეს.
ქვეყნის იუსტიციის მინისტრი აცხადებს, რომ იმ შემთხვევაში, თუკი უახლოეს საათებში შენობა არ დაიცლება, ის უშიშროების საბჭოს საგანგებო მდგომარეობის გამოცხადებას სთხოვს.
პარალელურად, გავრცელებული ინფორმაციით, ევრომაიდნის წევრები ცდილობენ დაადგინონ, შეესაბამება თუ არა სიმართლეს ცნობა იმის შესახებ, რომ ქვეყანაში რუსული სპეცრაზმი ჩამოდის. ამისთვის სპეციალური ჯგუფები შეიქმნა, რომლებიც მონაცემებს კიევის აეროპორტში ამოწმებენ.
მდგომარეობა კიდევ უფრო რთულდება უკრაინის რეგიონებში. დემონსტრაცია მოეწყო გასულ ღამეს ლვოვსა და ხარკოვში. ლვოვს უკვე ოპოზიციის მომხრეები აკონტროლებენ, რომლებმაც ეროვნული პარლამენტი შექმნეს და პირველი სხდომაც გამართეს.
ხარკოვში აქციის მონაწილეები არ შეჭრილან ადმინისტრაციაში, თუმცა ისინი გუბერნატორის გადადგომას ითხოვდნენ და ამბობდნენ, რომ თუკი მათი მოთხოვნა არ დაკმაყოფილდება, მზად არიან რადიკალურ ქმედებებზე წავიდნენ.
შეტაკებებით დასრულდა ადმინისტრაციული შენობის აღების მცდელობა ჩერკასკში. დაკავებულია 50-მდე ადამიანი. ქვეყნის ოლქების ნაწილს კი უკვე ოპოზიცია აკონტროლებს.
უკრაინაში მიმდინარე მოვლენები კვლავ რჩება საერთაშორისო საზოგადოების ყურადღების ცენტრში. მდგომარეობის დაძაბვასთან დაკავშირებით განცხადება გააკეთა გერმანიის საგარეო საქმეთა მინისტრმა. ფრანკ ვალტერ შტაინმაიერმა აღნიშნა, რომ პრობლემის მოგვარების ყველა რესურსი ამოწურული ჯერ კიდევ არაა.
უკრაინაში მიმდინარე მოვლენებს საკვირაო ლოცვისას გამოეხმაურა რომის პაპიც.
27.01.14
