ევროკავშირის უმაღლესი კომისარი გაფართოებისა და სამეზობლო პოლიტიკის საკითხებში შტეფან ფულე, საქართველოში ვიზიტის ფარგლებში, პირველ შეხვედრას საგარეო საქმეთა მინისტრ, მაია ფანჯიკიძესთან გამართავს.
როგორც შტეფან ფულემ ჟურნალისტებს აეროპორტში განუცხადა, იგი საქართველოში გუშინ უნდა ჩამოსულიყო, თუმცა მისი ვიზიტი, ევროკავშირის საგარეო ურთიერთობების საბჭოს გამო, ერთი დღით გადაიდო.
როგორც ფულემ აღნიშნა, ვიზიტის ფარგლებში ის შეხვდება რამდენიმე ოფიციალურ პირს, მათ შორის პრეზიდენტს, პრემიერს.
“ჩემი პროგრამის მნიშვნელოვანი ნაწილი სამოქალაქო საზოგადოებასთან შეხვედრაც იქნება. ძირითადი საკითხები, რასაც შევეხები, არის ასოცირების შესახებ შეთანხმება, ევროკავშირსა და საქართველოს შორის ურთიერთობა”, – განაცხადა ფულემ.
ევროკომისარმა უკრაინასთან დაკავშირებით ევროკავშირის საგარეო ურთიერთობების საბჭოს გუშინდელ განცხადებაზეც ისაუბრა.
“საბჭოს განცხადება, რუსეთის მხრიდან აგრესიის შესახებ, ძალიან ნათელია. მინისტრები დაინტერესებულები არიან, რომ მოხდეს ვითარების დეესკალაცია. მათ ასევე გამოხატეს მზადყოფნა ისევ შეხვდნენ ერთმანეთს და ისაუბრობენ იმ ღონისძიებაზე, რომელსაც განახორციელებენ იმ შემთხვევაში, თუ რუსეთი არ შეასრულებს საერთაშორისო ვალდებულებებს და პატივს არ სცემს უკრაინის ტერიტორიულ მთლიანობას”, -განაცხადა ფულემ.
ევროკავშირის უმაღლესი კომისარი გაფართოებისა და სამეზობლო პოლიტიკის საკითხებში, შტეფან ფულე საქართველოს დღეს ეწვია.
ევროკომისარი ევროკავშირისა და საქართველოს ურთიერთობების უმთავრეს საკითხებზე, კერძოდ, ასოცირების შეთანხმებასა და მის შემადგენელ ღრმა და ყოვლისმომცველ თავისუფალ სავაჭრო სივრცეზე ისაუბრებს.
ევროკომისარი და საქართველოს სახელმწიფო მინისტრი ევროპული და ევროატლანტიკური ინტეგრაციის საკითხებში ალექსი პეტრიაშვილი საჯარო ფინანსების რეფორმის მხარდაჭერის შესახებ მემორანდუმს მოაწერენ ხელს, ხოლო შტეფან ფულე და საქართველოს პარლამენტის თავმჯდომარე დავით უსუფაშვილი საქართველოს პარლამენტის მხარდაჭერის შესახებ ურთიერთგაგების მემორანდუმს გააფორმებენ.
04.03.14
