საქართველოს შრომის, ჯანმრთელობისა და სოციალური დაცვის მინისტრის, დავით სერგეენკოს განცხადებით, არსებობენ სპეციალისტები, რომლებიც ინტერნეტით გავრცელებული ზურაბ ჟვანიას და რაულ უსუპოვის ფოტოების ავთენტურობას დაადგენენ.
ამის შესახებ დავით სერგეენკომ ჟურნალისტებს მთავრობის დღევანდელი სხდომის დაწყებამდე განუცხადა.
“მე ამ საქმის სპეციალისტი არ გახლავართ, რომ შეფასება გავაკეთო, ავთენტურია თუ არა ფოტოები. თუმცა, ვფიქრობ, რომ არსებობენ ამის სპეციალისტები და ისინი ყველა საკითხს გასცემენ პასუხს”, – განაცხადა სერგეენკომ.
გუშინ სოციალურ ქსელში გავრცელდა ფოტოები სახელწოდებით – “სააკაშვილი მკვლელი”. ფოტომასალაზე ასახული საქართველოს ყოფილი პრემიერ-მინისტრის, ზურაბ ჟვანიასა და მასთან ერთად გარდაცვლილი რაულ იუსუპოვის ცხედრები.
გავრცელებული ფოტოების მიხედვით, ცხედრებს სხვადასხვა სახის დაზიანება აღინიშნებათ.
ფოტომასალა “იუთუბიზე” ჰაკიმ ფაშას სახელით არის ატვირთული.
20.03.14
