საქართველოს პრეზიდენტი დღეს საქართველო-ევროკავშირის საპარლამენტო თანამშრომლობის კომიტეტის წევრებს შეხვდა.
პრეზიდენტის ადმინისტრაციის ცნობით, მხარეებმა საქართველო-ევროკავშირს შორის თანამშრომლობის მთელი რიგი საკითხები განიხილეს. მათ შორის, საქართველოს მიერ ევროკავშირთან ასოცირების ხელშეკრულების ხელმოწერის დაჩქარების მნიშვნელობის თაობაზე ისაუბრეს.
პრეზიდენტის ადმინისტრაციის განცხადებით, უკრაინაში განვითარებული მოვლენების გათვალისწინებით, ქვეყნის პირველმა პირმა და საქართველო-ევროკავშირის საპარლამენტო თანამშრომლობის კომიტეტის თანათავმჯდომარემ, მილან ცაბრნოხმა ყურადღება გაამახვილეს საქართველოში სტაბილურობასა და რეგიონალურ უსაფრთხოების შესახებ. მათ ასევე კონფლიქტების დარეგულირებაში ევროკავშირის მნიშვნელოვან როლზე იმსჯელეს. საუბარი ევროკავშირის სამეთვალყურეო მისიის საქმიანობის კიდევ უფრო გააქტიურების შესაძლებლობებსაც შეეხო.
ამასთან, შეხვედრის მსვლელობისას, კანონის უზენაესობის, დემოკრატიის განვითარების, უმცირესობათა უფლებებისა და ზოგადად, ადამიანის უფლებათა დაცვის საკითხები განიხილეს, ასევე ასოცირების ხელშეკრულების ხელმოწერის შემდგომ პერიოდში საქართველოსა და ევროპას შორის ამ მიმართულებით თანამშრომლობის პერსპექტივები.
შეხვედრა პრეზიდენტის სასახლეში გაიმართა და მას ეროვნული უშიშროების საბჭოს მდივანი ირინა იმერლიშვილი, საქართველო-ევროკავშირის საპარლამენტო თანამშრომლობის კომიტეტის თანათავმჯდომარე თინა ხიდაშელი და პრეზიდენტის მრჩეველი საგარეო ურთიერთობების მიმართულებით ივანე მაჭავარიანი ესწრებოდნენ.
27.03.14
