საქართველოს პრეზიდენტი გიორგი მარგველაშვილი პოლონეთის პრეზიდენტს, ბრონისლავ კომაროვსკის შეხვდა. საქართველოს პრეზიდენტის ადმინისტრაციის ინფორმაციით, ორი ქვეყნის პრეზიდენტებმა პირისპირ შეხვედრა გამართეს.
“პოლონეთის რესპუბლიკა ევროკავშირის პირველი ქვეყანაა, რომელსაც საქართველოს პრეზიდენტი დღეს ოფიციალური ვიზიტით ეწვია”, – აცხადებენ ადმინისტრაციაში.
პოლონეთის პრეზიდენტის სასახლეში დახვედრის ოფიციალური ცერემონიის შემდეგ, საქართველოსა და პოლონეთის ლიდერებმა პირისპირ შეხვედრა გამართეს, რომელიც მოგვიანებით გაფართოებული შემადგენლობით გაგრძელდა.
მხარეებმა ორ ქვეყანას შორის არსებული ურთიერთობის შესახებ იმსჯელეს და აღნიშნეს, რომ აუცილებელია თანამშრომლობის გაღრმავება, უპირველესად, ეკონომიკის სფეროში, მათ შორის, ვაჭრობის მიმართულებით.
გიორგი მარგველაშვილმა ბრონისლავ კომაროვსკისთან საქართველოს ევროპული და ევროატლანტიკური ინტეგრაციის საკითხებზე ისაუბრა და ყურადღება ევროინტეგრაციის თვალსაზრისით პოლონეთის გამოცდილებაზე გაამახვილა.
შეხვედრის ერთ-ერთი მთავარი თემა საერთაშორისო უსაფრთხოების საკითხიც იყო. საუბარი უკრაინაში შექმნილ კრიზისსაც შეეხო.
საქართველოს პირველმა პირმა საქართველოს სუვერენიტეტის, ტერიტორიული მთლიანობისა და ევროპული და ევროატლანტიკური ინტეგრაციის გზაზე მხარდაჭერისთვის პოლონელ კოლეგას მადლობა გადაუხადა.
შეხვედრის დასასრულს ორი ქვეყნის ლიდერებმა ერთობლივი პრესკონფერენცია გამართეს და ქართული და საერთაშორისო მედიის წარმომადგენლებთან შეხვედრის შედეგები შეაჯამეს.
02.04.14
