საქართველოს პრემიერ-მინისტრი ირაკლი ღარიბაშვილი სლოვაკეთის რესპუბლიკის ვიცე-პრემიერს, საგარეო და ევროპულ საქმეთა მინისტრ მიროსლავ ლაიჩაკს შეხვდა.
პრემიერის პრესსამსახურის ინფორმაციით, ირაკლი ღარიბაშვილი შეხვედრაზე მიესალმა საქართველოში სლოვაკეთის საელჩოს გახსნას, რომელიც ოფიციალურად დღეიდან შეუდგა მუშაობას.
მხარეებმა ორი ქვეყნის თანამშრომლობის ძირითად ასპექტებსა და მისი გაღრმავების პერსპექტივებზე იმსჯელეს.
“ირაკლი ღარიბაშვილმა მიროსლავ ლაიჩაკს საქართველოს ტერიტორიული მთლიანობისა და ევროატლანტიკური მისწრაფებების მხარდაჭერისთვის მადლობა გადაუხადა. პრემიერმა შეხვედრაზე ხაზი გაუსვა სლოვაკეთის რესპუბლიკასთან სავაჭრო-ეკონომიკური ურთიერთობების განვითარების მნიშვნელობას და აღნიშნა, რომ ევროკავშირთან ღრმა და ყოვლისმომცველი თავისუფალი სივრცის შესახებ შეთანხმება ამ მიმართულებით დამატებით პერსპექტივებს გააჩენს.
საქართველოს მთავრობის მეთაურმა კიდევ ერთხელ დაადასტურა ხელისუფლების მზადყოფნა, შეასრულოს ევროკავშირთან ასოცირების შეთანხმებით ნაკისრი ვალდებულებები და გაატაროს შესაბამისი რეფორმები”, – აცხადებენ პრემიერის პრესსამსახურში.
ამასთან, ოფიციალური ინფორმაციით, შეხვედრაზე ხაზგასმით აღინიშნა საქართველოში ევროკავშირის მონიტორინგის მისიის საქმიანობის მნიშვნელობაც.
საქართველოს პრემიერ-მინისტრთან შეხვედრას სლოვაკეთის რესპუბლიკის ჯანდაცვის მინისტრი ზუზანა ზვოლენსკა, აღმოსავლეთ ევროპის, სამხრეთ კავკასიისა და ცენტრალური აზიის დეპარტამენტის დირექტორი ბრანისლავ ჰიტკა, სლოვაკეთის რესპუბლიკის საგანგებო და სრულუფლებიანი ელჩი საქართველოში მილან ზახარი, სლოვაკეთის საქმეთა რწმუნებული საქართველოში რუდოლს მიხალკა, საქართველოს საგარეო საქმეთა მინისტრი მაია ფანჯიკიძე, საქართველოს საგანგებო და სრულუფლებიანი ელჩი სლოვაკეთის რესპუბლიკაში ალექსანდრე ნალბანდოვი ესწრებოდნენ.
08.04.14
