თურქეთის პრეზიდენტის აბდულა გიულის განცხადებით, ბაქო-თბილისი-ყარსის სარკინიგზო პროექტი ძალიან მალე დასრულდება.
საქართველოს, აზერბაიჯანისა და თურქეთის პრეზიდენტებმა მედიისთვის განცხადებები პრეზიდენტის ადმინისტრაციაში სამმხრივი შეხვედრის შემდეგ გააკეთეს.
“ჩვენ აქ შევიკრიბეთ სამი ქვეყნის პრეზიდენტები, რომელთაც გვაქვს საერთო ხედვა სამხრეთ კავკასიის რეგიონთან დაკავშირებით. ჩვენ გვქონდა შესაძლებლობა, დეტალურად განგვეხილა სხვადასხვა ასპექტები ჩვენი თანამშრომლობისა. თურქეთს, აზერბაიჯანსა და საქართველოს ცალ-ცალკე გვაქვს ძალიან კარგი ურთიერთობები ორმხრივი ურთიერთობების საფუძველზე. საქართველოსთან გვაქვს 1,5 მილიარდი დოლარის ტვირთბრუნვა და თურქეთის ინვესტიციები საქართველოში 1 მილიარდზე მეტია. არიან თურქული კომპანიები, რომლებიც აგრძელებენ საქართველოში ინვესტირებას ძალიან დიდი ინტერესით. ჩვენ მოქალაქეებს შეუძლიათ იმოძრაონ პასპორტის, ვიზის გარეშე, უბრალოდ პირადობის მოწმობის საფუძველზე. ჩვენ გვაქვს განსაკუთრებული, ბრწყინვალე ურთიერთობები აზერბაიჯანთან. ჩვენი ეკონომიკური ურთიერთობები, კერძოდ ტვირთბრუნვა 4,7 მილიარდი დოლარის ტოლია და ინვესტიციების ყოველდღიურად იზრდება”, – განაცხადა გიულიმ.
მისივე თქმით, გეოგრაფიული კავშირები თურქეთს, საქართველოსა და აზერბაიჯანს ძალიან მნიშვნელოვან მიზიდულობის ცენტრს ქმნის.
“გულწრფელი ურთიერთობები სამ ქვეყანას შორის რეგიონს მართლაც ძალიან მნიშვნელოვან ცენტრს ხდის ინვესტიციებისთვის. რეგიონის სიძლიერე სულ უფროდაუფრო იზრდება, ამას ყველა აცნობიერებს. არის ძალიან მნიშვნელოვანი პროექტები, განსაკუთრებით ბაქო-თბილისი-ჯეიჰანი, ბაქო-თბილის-ერზრუმის გაზსადენი, ბაქო-თბილისი-ყარსის სარკინიგზო პროექტი. მთელი მსოფლიო დიდი ყურადღებით და პატივისცემით აკვირდება მათ განხორციელებას. წარსულში ამბობდნენ, რომ ეს იყო უბრალოდ განუხორციელებელი ოცნება. პირველი თუ უკვე განხორციელებულია, მესამე – სარკინიზგო მიმოსვლა მალე დასრულდება.”, – განაცხადა გიულიმ.
მისივე თქმით, სამიტის ფარგლებში ტრანსპორტის მინისტრებმა დეტალური პრეზენტაცია გააკეთეს, თუ რა ხდება ამ მიმართულებით.
“ძალზე მოხარული ვართ, რომ ეს პროექტი, რომელიც ათასობით კოლომეტრის რკინიგზას გულისხმობს, მე ვფიქრობ, ძალიან მალე იქნება სრულიად დასრულებული. არანაკლებ მნიშვნელოვანია ენერგოსფეროში საერთო პროექტების განხორციელება. ეს კოორდინაცია ძალიან მნიშვნელოვანია პრაქტიკული თვალსაზრისითაც”, – განაცხადა აბდულა გიულიმ.
06.05.14