ძალიან გვიხარია, რომ საქართველო დაადგა ევროკავშირისკენ მიახლოების გზას, – ამის შესახებ გერმანიის კანცლერმა ანგელა მერკელმა საქართველოს პრემიერ-მინისტრ ირაკლი ღარიბაშვილთან შეხვედრის შემდეგ გამართულ ერთობლივ პრესკონფერენციაზე განაცხადა. მისივე განმარტებით, მისასალმებელია ისიც, რომ ამის პარალელურად საქართველო ურთიერთობას ალაგებს რუსეთთანაც.
“ეს არის ირაკლი ღარიბაშვილის ოფიციალური ვიზიტი გერმანიაში. ძალიან მიხარია, რიომ შემიძლია მას აქ მივესალმო. ჩვენ დაწვრილებით ვისაუბრეთ საქართველო-გერმანიის ორმხრივ ურთიერობაზე. ჩვენ კარგი ორმხრივი ურთიერთობა გვაქვს. ძალიან გვიხარია, რომ საქართველო დაადგა ევროკავშირისკენ მიახლოების გზას, რაც გამოიხატება ასოცირების შესახებ ხელშეკრულების ხემოწერაში. მეორე მხრივ, ვხედავთ რომ საქართველო დაინტერესებულია ნაბიჯ-ნაბიჯ განავითაროს ურთიერთობა რუსეთთან – ამ მაგალითზეც ჩვენ ვხედავთ, რომ საქართველო ორივე მიმართულებით მუშაობს”, – განაცხადა ანგელა მერკელმა.
ამასთან, გერმანიის კანცლერის შეფასებით, კიდევ უფრო მეტი უნდა გაკეთდეს იმისთვის, რომ ხელი შეეწყოს საქართველოსა და გერმანიის ეკონომიკურ ურთიერთობას.
“ბატონი პრემიერი დაესწრება ეკონომიკურ ფორუმს, რომელსაც ჩვენი მხარდაჭერა აქვს, რათა განვითარდეს პარტნიორობა და ინვესტიციები საქართველოში. ამისთვის თქვენი ქვეყანა კარგ პირობებს ქმნის, თუმცა უკანასკნელ წლებში გარკვეული არასტაბილურობის შთაბეჭდილება იქმნებოდა ოსეთისა და აფხაზეთის პრობლემების გამო. შეგვიძლია ვთქვათ, რომ საქართველოს დღევანდელი მთავრობა ნათლად ასრულებს ყველანაირ საკანონმდებლო ჩარჩო პირობებს და ეს ხელს შეუწყობს მომავალ თანამშრომლობას. ძალიან მნიშვნელოვანია, რომ საქართველო, როგორც კარგი საინვესტიციო პარტნიორი გახდეს უფრო ცნობილი”, – აღნიშნა გერმანიის კანცლერმა.
02.06.14
