“ღრმა და ყოვლისმომცველი თავისუფალი ვაჭრობის სივრცე ქართული ბიზნესისთვის ფაქტობრივად ამოუწურავ შესაძლებლობებს ქმნის”

საქართველოს პრემიერ-მინისტრის ირაკლი ღარიბაშვილის განცხადებით, “გასათვალისწინებელია, რომ ახალ შესაძლებლობებთან ერთად, ევროკავშირთან ასოცირების პროცესს თან ახლავს გამოწვევებიც”.

ამის შესახებ პრემიერ-მინისტრმა სასტუმრო “რედისონში” საქართველო-ევროკავშირის საერთაშორისო ინვესტორთა კონფერენციაზე სიტყვით გამოსვლისას განაცხადა. ირაკლი ღარიბაშვილმა ისაუბრა ასოცირების შეთანხმების უმთავრესი კომპონენტის – ღრმა და ყოვლისმომცველი თავისუფალი ვაჭრობის სივრცის პერპექტივების შესახებ და აღნიშნა, რომ ეს სტიმულია საქართველოს ეკონომიკური განვითარებისთვის.

“იმედი მაქვს, რომ ქართული და საერთაშორისო ბიზნესწრეები ჯეროვანი ყურადღებით მოეკიდებიან ამ ახალ რეალობებს და ისარგებლებენ ახალი შესაძლებლობებით. ღრმა და ყოვლისმომცველი თავისუფალი ვაჭრობის სივრცე ქართული ბიზნესისთვის ფაქტობრივად ამოუწურავ შესაძლებლობებს ქმნის მსოფლიოში ყველაზე დიდ, სტაბილურ და მაღალი მყიდველობითი უნარით გამორჩეულ ბაზარზე”, – განაცხადა პრემიერმა.

მისივე თქმით, საქართველოს ხელისუფლება საერთაშორისო ვაჭრობას განიხილავს როგორც საერთაშორისო თანამშრომლობისა და სტაბილურობის ხელშემწყობ მნიშვნელოვან ელემენტს და მხარს უჭერს ვაჭრობის მსოფლიო ორგანიზაციის პრინციპებზე დაყრდნობით საერთაშორისო ვაჭრობის ლიბერალიზაციას.

“ევროკავშირი, გარდა იმისა, რომ არის ყველაზე წარმატებული ეკონომიკური კავშირი, იგი ამავე დროს არის “მშვიდობის პროექტიც”. ვფიქრობთ, რომ საქართველოსა და ევროკავშირს შორის გაღრმავებული სავაჭრო ურთიერთობები და საქართველოს ეტაპობრივი ინტეგრაცია ევროკავშირის შიდა ბაზარზე ხელს შეუწყობს ჩვენი რეგიონის ქვეყნებთან სავაჭრო-საინვესტიციო საქმიანობის გააქტიურებას, რაც დადებითად აისახება რეგიონალურ სტაბილურობასა და თანამშრომლობაზე. ამასთან, უნდა გავითვალისწინოთ, რომ ასოცირების პროცესი იქნება საკმაოდ რთული. ეს მოითხოვს 24-საათიან მუშაობას. ახალ შესაძლებლობებთან ერთად, ამას თან ახლავს გამოწვევებიც. და აქ ვგულისხმობ იმ ფართომასშტაბიან რეფორმებს, რომლებიც საქართველომ უნდა განახორციელოს ევროკავშირთან პოლიტიკური ასოცირებისა და ეკონომიკური ინტეგრაციის გზაზე. შესაბამის სფეროებში საქართველოს კანონმდებლობის ევროკავშირის კანონმდებლობასთან პროგრესული დაახლოება და მისი ეფექტიანი იმპლემენტაცია, აგრეთვე საქართველოს ადმინისტრაციული და ინსტიტუციონალური ინფრასტრუქტურის განვითარება დაკავშირებულია მნიშვნელოვან ტექნიკურ, ფინანსურ და ადამიანურ რესურსებთან”, – განაცხადა და დასძინა, რომ ამიტომაც საქართველოსთვის უდიდესი მნიშვნელობა აქვს ევროკავშირისა და ჩვენი საერთაშორისო პარტნიორების მხარდაჭერას.

13.06.14