მნიშვნელოვანია, რომ სკანდალური მოხსნები და გაძევებები არ არის, როგორც პრემიერ-მინისტრმა აღნიშნა, ყველა რჩება გუნდის წევრად, – ამის შესახებ საპარლამენტო უმრავლესობის წევრმა ლევან ბერძენიშვილმა ბათუმში ჟურნალისტებს მინისტრების გათავისუფლების საკითხის კომენტირებისას განუცხადა.
როგორც ლევან ბერძენიშვილმა განმარტა, ნებისმიერ სამთავრობო სტრუქტურას სჭირდება ცვლილებები. მისივე თქმით, ცვლილებები იმ ტემპით არ ხორციელდება, როგორც ეს წინა მთავრობის დროს იყო. ლევან ბერძენიშვილის განმარტებით, მინისტრთა კაბინეტი ბიძინა ივანიშვილის პრემიერ-მინისტრობის დროს დაკომპლექტდა და მოქმედ პრემიერ-მინისტრს თავისი ხედვა აქვს.
“ჩვენ ცვლილებებს იმ ტემპით არ ვაკეთებთ, როგორც ამას წინა ხელისუფლება აკეთებდა. როგორც ატყობთ, საკმაოდ დიდხანს გაძლო მინისტრთა კაბინეტმა ცვლილებების გარეშე, მაგრამ ცვლილებები აუცილებელი და ჩვეულებრივი პროცესია ნებისმიერი ქვეყნის მთავრობისთვის. მითუმეტეს, რომ იყო სხვა პრემიერ-მინისტრი და ახლა არის სხვა, რომელსაც თავისი სტილი და ხედვა აქვს. გასაგებია, რომ ასეთი ცვლილებები შეიძლება იყოს. საინტერესოა, რომ ორი მინისტრი გადაადგილდა, ჩვეულებრივი პროცესია ესეც”, – აღნიშნა ლევან ბერძენიშვილმა.
ამასთან, ჟურნალისტების კითხვაზე, გავრცელებული ინფორმაციით მინისტრობის კანდიდატები პარლამენტიდან შესაძლოა იყვნენ წარდგენილი, ლევან ბერძენიშვილმა აღნიშნა, რომ საკითხი პოლიტსაბჭოზეა განხილული და “არც ეს გამოირიცხება”:
“საკითხი არის პოლიტსაბჭოზე განხილული და შესაძლოა პოლიტსაბჭოს წევრები ფლობენ ინფორმაციას, მაგრამ ჩვენ ორი დღეა ბათუმში ვართ და არ ვიცით. თუმცა არ გამოვრიცხავ, რადგან საქართველოში კადრები გვყავს ბევრ ადგილას და მათ შორის პარლამენტშიც”, – აღნიშნა ლევან ბერძენიშვილმა.
პრემიერ-მინისტრმა ირაკლი ღარიბაშვილმა შვიდი მინისტრი სამსახურიდან გაათავისუფლა.
21.07.14
