“სოლიდარობის ფონდს” ჯანდაცვის მინისტრის მოადგილე მარიამ ჯაში უხელმძღვანელებს. ამის შესახებ ჟურნალისტებს “სოლიდარობის ფონდის” სამეთვალყურეო საბჭოს სხდომის დასრულების შემდეგ მთავრობის ადმინისტრაციის უფროსის მოადგილემ ნინო კობახიძემ განუცხადა.
მისი თქმით, დღევანდელი მონაცემებით, საჯარო სექტორიდან დაახლოებით 14 ათასმა ადამიანმა გამოხატა სურვილი, ნებაყოფლობით შეუერთდეს ფონდის საქმიანობას.
“დაახლოებით 150 ათას ლარამდე ავედით, ყოველთვიური შენატანების მოცულობით. დღეს სამეთვალყურეო საბჭომ დაამტკიცა მთელი კონცეფცია მუდმივმოქმედი კომისიის მუშაობის და ზოგადად სამეთვალყურეო საბჭოს შემადგენლობის, ქალბატონი მარიამ ჯაში აირჩიეს ფონდის ხელმძღვანელად. 1-ელი სექტემბრიდან დავიწყებთ განაცხადების მიღებას, იმედი გვაქვს, რომ 4-5 ბავშვის დაფინანსებას სექტემბერშივე შევძლებთ, ხოლო წლის ბოლომდე დაახლოებით 8 მილიონის მობილიზებას ვვარაუდობთ, რომელიც მთლიანად მოხმარდება ონკოლოგიურად დაავადებულ ბავშვებს”, – განაცხადა ნინო კობახიძემ.
19.08.14
