ფინანსთა მინისტრის ნოდარ ხადურის ინფორმაციით, დარიალის ხეობაში საბაჟო-გამშვებ პუნქტზე ზარალმა შესაძლოა სამი მილიონი დოლარი შეადგინოს.
როგორც ნოდარ ხადურმა ჟურნალისტებს განუცხადა, დარიალში დაზიანებულია საბაჟო ინფრასტრუქტურა.
“სამი ნაგებობიდან ორი დაფარული იყო ხრეშითა და ქვიშით. მათი გაწმენდა მიმდინარეობს ახლა და ამ წუთას შეიძლება ითქვას, რომ დაზიანებულია ხელბარგის სკანერი, ასევე დაზიანებლია საკმაოდ ძვირადღირებული სასწორი, რომელიც სატვირთო მანქანების ასაწონად გამოიყენება. რაც შეეხება სკანერს, მიმდინარეობს მისი ტესტირება და ორ-სამ დღეში გვეცოდინება ის, დაზიანებულია თუ არა. სკანერის გარეშე ზარალი არის მილიონი დოლარი თუ სკანერიც დაზიანებულია, მაშინ დაახლოებით 3 მილიონის ზარალი გვექნება მარტო საბაჟოზე”, – აღნიშნა მინისტრმა.
მისივე ინფორმაციით, უკვე დაწყებულია გზის რეაბილიტაცია და როგორცკი გზა იქნება გაწმენდილი, სამინისტრო მზად არის, საბაჟო-გამშვებმა პუნქტმა იმუშაოს.
“პარალელურად მოვახდენთ სხვა ნაგებობის რეაბილიტაციას. ასე, რომ საბაჟო ხელს არ შეუშლის არც ექსპორტს, არც იმპორტს და არც ტრანზიტს. ჩვენ მზად ვართ. ინფრასტრუქტურის სამინისტრო ამბობს, რომ 2 კვირა დასჭირდება გზის რეაბილიტაციას, როგორცკი გზა გაიხსნება, საბაჟო იქნება მზად. ამ წუთასაც ჩვენი მებაჟეები არიან ადგილზე, მათ შეუძლიათ ტვირთები გააფორმონ, მაგრამ სტიქიის გამო ასეთი ტვირთები არ არის”, – განაცხადა ნოდარ ხადურმა.
დარიალის ხეობაში მეწყერი 20 აგვისტოს ჩამოწვა.
25.08.14
