ყოფილი პრემიერი ბიძინა ივანიშვილი გაზეთ „კვირის პალიტრასთან” ექსკლუზიურ ინტერვიუში აცხადებს, რომ პრეზიდენტ გიორგი მარგველაშვილს მთავრობასთან კონკურენციაში ყოფნა სურს. ივანიშვილი მიიჩნევს, რომ ეს ქვეყანას აზიანებს და პრეზიდენტი ამას უნდა მიხვდეს.
“ინაუგურაციის მეორე თუ მესამე დღესვე, როცა სიტუაციის დალაგება დავიწყეთ და გაუგებრობაში აღმოვჩნდით, ჩვენი პოლემიკის ერთ-ერთი საგანი გახლდათ პრეზიდენტ მარგველაშვილის პოზიცია, რომ ის კონკურენციაში უნდა იყოს მთავრობასთან და პარლამენტთან.
ჩვენ ამაზე ძალიან ბევრი დრო დავხარჯეთ და ეს ჩემთვის იყო გაუგებარი. მე მას ვეუბნებოდი, რომ ეს პოზიცია არ არის სწორი, თქვენ უნდა მოხვიდეთ ერთ გუნდად, “ქართული ოცნების” გუნდი გეხმარებოდა მთელი არჩევნების განმავლობაში, მხარს გიჭერდა, ჯერ ერთი, არაკორექტულია და მეორეც, კონკურენცია დაგაზარალებთ. თქვენ კონკურენტი გყავთ უმუშევრობის სახით, უამრავი პრობლემის სახით, მათ შორის ტერიტორიული მთლიანობის, საგარეო პოლიტიკის და ა.შ. სახით, რომ ეს არის თქვენი კონკურენტი. ხელი-ხელს ჩაკიდეთ, თქვენ ერთად უნდა იმუშაოთ და არ უნდა იყოს კონკურენცია. ვკითხე, რატომ გინდა კონკურენცია, მან მე ეს მერე დამისაბუთა, საბოლოოდ, მე ჩემს აზრზე დავრჩი, მას კი თავისი აზრი არ შეუცვლია, რომ უნდა იყოს კონკურენცია.
რა შუაშია მთავრობა? ან ის, რომ ის პრეზიდენტის სასახლეში შევიდა ისე, რომ გუნდის არცერთ წევრს არ ჰკითხა და იცოდა უარყოფითი განწყობა ამაზე, თვითონაც უარყოფითი განწყობა ჰქონდა. ვეტოს დადება ძლივს გადაიფიქრა კანონპროექტზე, რომელიც წაკითხული არ ჰქონდა და პროკურატურას “გრიფი” მთელი თვე არ მოუხსნა, სანამ არ გასაჯაროვდა. რა შუაშია აქ მთავრობა? მის ყველა ქმედებაში განა მარტივი დასანახი არ არის, რომ, ეს სიტყვა არ მინდა ვიხმარო, მაგრამ, კონკურენტს ებრძვის, კონკურენტთან აქვს საქმე და უნდა ხელი შეუშალოს. ამით, საბოლოო ჯამში, ქვეყანას ეშლება ხელი და ამას უნდა მიხვდეს პრეზიდენტი მარგველაშვილი.
ის, რომ საშინელ ზეწოლას განიცდის დღევანდელი მთავრობა, მეც მწდვებიან დღესაც კი, რომ კითხვები დამისვან და მე მაქსიმალურად ვცდილობ, რომ არ ვიყო საჯარო და ხელისუფლებაზე გადამაქვს ეს საკითხი. მეკითხებიან რა ხდება და არის თუ არა პოლიტიკურად დევნილი სააკაშვილი. ჩვენ რეალურად კარგად ვიცით საზოგადოებამ, რა ხდება და როგორ იყო სააკაშვილი. ამ ფონზე, როდესაც ერთი თვე არ ხსნი გრიფით “საიდუმლოს” ელემენტარულ საბუთს და, ამავდროულად, აცხადებ, რომ კონკურენციაში გინდა იყო ხელისუფლებასთან, ეს საბოლოო ჯამში, რა თქმა უნდა, აზარალებს ქვეყანას.” – განაცხადა ბიძინა ივანიშვილმა
ყოფილი პრემიერის ინტერვიუ, სააგენტო ipn-ის ინფორმაციით, „კვირის პალიტრის“ 15 სექტემბრის ნომერში გამოქვეყნდება.
11.09.14
