პრეზიდენტი გიორგი მარგველაშვილი აჭარაში სტიქიის შედეგებს გაეცნო. მან ბათუმის რეფერალურ საავადმყოფოში მოინახულა 36 წლის ამირან სამნიძე, რომელიც მეწყრის ჩამოწოლის დროს დაზიანდა.
ამირან სამნიძემ პრეზიდენტს მოუყვა, რომ მაშველმა მისი გადარჩენა დიდი ძალისხმევის შედეგად შეძლო.
როგორც გიორგი მარგველაშვილმა განაცხადა, ბათუმში ჩავიდა იმისთვის, რომ აჭარის მთავრობას მხარში ამოუდგეს. პრეზიდენტმა აჭარის მთავრობის მეთაურს გადასცა, რომ მაშველს, ვახტანგ დევაძეს მადლობა გადაუხადონ.
“დატბორვის მიზეზებს და იმ შედეგს, რაც მოხდა, სწავლობს აჭარის ხელისუფლება. ჩვენ მოვედით, რომ მხარში ამოვუდგეთ აჭარის მთავრობას, აგრეთვე იმისთვის, რომ გვენახა როგორ მიმდინარეობს სამუშაოები. პირველ რიგში, ბუნებრივია, მოვინახულეთ მეწყრის დროს დაზარალებული. ის არის უაღრესად მადლობელი იმ მაშველის, რომელმაც კარგად იმუშავა, ასევე, იმ მედპერსონალის, რომელიც ყურადღებით მუშაობს მასთან”, – აღნიშნა გიორგი მარგველაშვილმა.
პრეზიდენტი და უშიშროების საბჭოს მდივანი ირინა იმერლიშვილი აჭარის მთავრობის სახლში სტიქიის სალიკვიდაციო საგანგებო შტაბის მუშაობას გაეცნო. ამ წუთებში პრეზიდენტი და არჩილ ხაბაძე დახურულ კარს მიღმა ერთმანეთს ხვდებიან. გიორგი მარგველაშვილი ასევე, დაათვალიერებს ქობულეთში მეწყრის შედეგად დაზიანებულ ზონას.
22.09.14
