საქართველოს მეცნიერებათა ეროვნულ აკადემიაში საპატიო აკადემიკოსებად მწერალი ჭაბუა ამირეჯიბი (ბერი დავითი), მოქანდაკე მერაბ ბერძენიშვილი და რუსეთის მეცნიერებათა აკადემიის აკადემიკოსი, მედიკოსი სერგეი მირონოვი აირჩიეს.
აკადემიის საერთო კრებას სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე ესწრებოდა.
უწმინდესი მეცნიერებათა ეროვნული აკადემიის საპატიო აკადემიკოსია. პატრიარქმა აკადემიკოსებს მიმართა და დასახელებული კანდიდატების მიმართ საკუთარი მხარდაჭერა გამოხატა.
პატრიარქმა აღნიშნა, რომ ჭაბუა ამირეჯიბი არის ეტალონი სამშობლოსათვის თავდადებული ადამიანის, მან ბევრი რამ გააკეთა კეთილი და დღესაც აკეთებს.
უწმინდესმა აღნიშნა, რომ ჭაბუა ამირეჯიბის, იგივე ბერი დავითის სულიერი ინტელექტი იმდენად მაღალია, რომ ახლახან იგი ბერად აღიკვეცა და ეწოდა ბერი დავითი.
უწმინდესმა ისაუბრა, ასევე, მერაბ ბერძენიშვილის შესახებაც და აღნიშნა, რომ მსოფლიოში ცნობილი მოქანდაკეა და ღირსია ამ წოდების.
სერგეი მირონოვთან დაკავშირებით პატრიარქმა განაცხადა, რომ მას ჰყავს ქართველი მეუღლე, რძალი და ძალიან უყვარს საქართველო.
სხდომაზე ბერი დავითი იგივე ჭაბუა ამირეჯიბი, მერაბ ბერძენიშვილი და სერგეი მირონოვი ერთხმად აირჩიეს საქართველოს ეროვნული აკადემიის საპატიო აკადემიკოსებად.
02.05.13
