საქართველოს სავაჭრო სამრეწველო პალატაში, ახალგაზრდა ანალიტიკოსთა და მეცნიერთა დარბაზ „დოქტრინას“ ორგანიზებით ეკონომიკური ფორუმი – „საქართველოს სუფთა ექსპორტი – რეალობა სტატისტიკის მიღმა“ ჩატარდა. ფორუმი ორგანიზაციის დირექტრომა მიხეილ დუნდუამ გახსნა, შეხვედრაზე ორგანიზაციის წარმომადგენლებთან ერთად ექსპერტები ეკონომიკის დარგში იმყოფებოდნენ.
შეხვედრაზე, საქართველოში პირველად მოხდა საქართველოს რეალური ექსპორტის მიმდინარე ანგარიშის წარდგენა. სწორედ ეს უპრეცედენტო მოვლენა გახდა ფორუმის ორგანიზების მიზეზი. ფორუმის ორგანიზატორებმა დამსწრე საზოგადოებას გააცნეს რეალური ექსპორტის მნიშვნელობა, რომელიც გულისხმობს საქართველოს ექსპორტს – რეექსპორტის გარეშე.
ანგარიშის მიხედვით, გასულ წელს ქართული ექსპორტის მთლიანი მოცულობის 36%-ს რეექსპორტი შეადგენდა, ეს უკანასკნელი კი იმპროტით შემოსული პროდუქციის ხელახალ გატანას გულისხმობს საზღვარგარეთ.
ახალგაზრდა ანალიტიკოსთა და მეცნიერთა დარბაზ „დოქტრინას“ დირექტორი მიხეილ დუნდუა:
„ჩვენ, დღევანდელი დღის საშუალებით გვინდოდა გვეჩვენებინა რეალური ექსპორტის მიმდინარე ანგარიში. რეექსპორტი ეს იგივე იმპორტით შემოსული პროდუქციის ხელახალი გატანის პროცესია საზღვარგარეთ. ჩვენ ვაკვირდებოდით ამ პროცესებს და კვლევების საშუალებით დავინახეთ საინტერესო მაჩვენებელი. მაგალითად – 2012 წლის სუფთა ექსპორტის 5%-იანმა ვარდნამ მნიშვნელოვნად შეაფერხა 2013 წლის მშპს-ის ზრდა, ხოლო 2013 წლის სუფთა ექსპორტის 15%-იანი ზრდა უკვე გავლენას 2014 წლის ეკონომიკურ ზრდაზე მოახდენს. ეს კარგი მაჩვენებელია, თუმცა თვითკმაყოფილების საშუალებას მაინც არ გვაძლევს. ამ ყველაფერს შენარჩუნება, გაძლიერება და სახელმწიფოს მხრიდან მხარდაჭერა სჭირდება. ამიტომ ,შემდეგ შეხვედრებზე ვგეგმავთ, რომ სხვადასხვა რეკომენდაცია და დამატებითი დეტალები გავაცნოთ დაინტერესებულ პირებსა და ხელისუფლების წარმომადგენლებს, რომ მონაწილეობა მიიღონ ამ პარამეტრების გაუმჯობესებაში.“
ექსპერტი ეკონომიკის საკითხებში ლევან კალანდაძე
„დღევანდელი შეხვედრა ძალიან საინტერესოდ წარიმართა, დადებითად შევაფასებ ამ ახალგაზრდების ინიციატივას და მონდომებას. ეს არის სერიოზული და მნიშვნელოვანი წამოწყება, რომელიც ვფიქრობ, ქვეყნის ეკონომიკურ პოლიტიკას აუცილებლად წაადგება. მთავარია ეს ანალიზი და შედეგები შესაბამისმა ორგანოებმა გაითვალისწინონ და ბიუჯეტის დაგეგმვის პროცესშიც გამოიყენონ.“
ანგარიშის მიხედვით, საექსპორტო საკითხებზე რამდენიმე საინტერესო ტენდენცია დაფიქსირდა: ქართველი ექსპორტისთვის უმწვავესი აღმოჩნდა 2012 წელი, როდესაც რეალური ექსპორტი 5,1 %-ით დაეცა. რაც შეეხება 2013 წელს მაჩენებელი გასულ წელს 14,9%-ით გაიზარდა, ხოლო 2011 წელთან შეადრებით 2013 წელს ზრდამ მხოლოდ 9% შეადგინა. ამასთან, 2013 წელს საქართველოს მთლიანმა ექსპორტმა ევროკავშირის ქვეყნებთან 606 მილიონი დოლარი შეადგინა, რაც 73%-ით აღემატება 2012 წლის მონაცემებს.
ინფორმაციისთვის, ახალგაზრდა ანალიტიკოსთა და მეცნიერთა დარბაზი „დოქტრინას“ საქმიანობის ძირითად სფეროს, სხვა მნიშვნელოვან აქტივობებთან ერთად აქტუალური სამეცნიერო საკითხების, საზოგადოებისათვის აქტუალური პრობლემებისა და მათი გამომწვევი მიზეზებს კვლევა წარმოადგენს. ამასთანავე, „დოქტრინა“ ატარებს სემინარებს, საჯარო განხილვებს, დისკუსიებსა და სამუშაო შეხვედრებს შესწავლილი და საკვლევი სფეროების ირგვლივ. იწვევს მედიისა და შესაბამისი სფეროს სპეციალისტებს და აწვდის მათ სრულყოფილ ინფორმაციას კვლევის შედეგებისა და მნიშვნელობის თაობაზე.
24.10.14
http://www.doctrina.ge/Geo/news-geo/item/485-2014-10-24-13-10-36
ნათია კეკენაძე