საქართველოს საგარეო საქმეთა მინისტრის მოადგილემ, თამარ ბერუჩაშვილმა, საქართველოში ვიზიტად მყოფ უნგრეთის საგარეო საქმეთა და ვაჭრობის მინისტრის მოადგილესთან, საპარლამენტო საკითხებში სახელმწიფო მდივან ლასლო საბოსთან შეხვედრა გამართა. საგარეო საქმეთა სამინისტროს ინფორმაციით, ლასლო საბო საქართველოს საქართველოსა და უნგრეთს შორის ეკონომიკური თანამშრომლობის მთავრობათაშორისი კომისიის სხდომის თანათავმჯდომარის რანგში ესტუმრა. შეხვედრაზე აღინიშნა, რომ ორმხრივი და მრავალმხრივი ურთიერთობების ფორმატებში ქვეყნები დინამიურად და ნაყოფიერად თანამშრომლობენ. მხარეებმა დასახეს საქართველოსა და უნგრეთს შორის არსებული ეკონომიკური თანამშრომლობის შემდგომი პრიორიტეტები. საგარეო საქმეთა მინისტრის მოადგილეებმა ხაზი გაუსვეს, რომ სრულად უნდა იქნას გამოყენებული პოტენციალი, რომელსაც ორ ქვეყანას შორის სავაჭრო და ეკონომიკური ურთიერთობები მოიცავს. თამარ ბერუჩაშვილი მიესალმა უნგრული მხარის მზაობას საქართველოში განახორციელოს კონკრეტული ეკონომიკური პროექტები და მოიზიდოს უნგრული ინვესტიციები. საუბრისას ხაზი გაესვა საქართველოს ევროკავშირში ინტეგრაციის გზაზე უნგრეთის მიერ გამოცდილების გაზიარების მნიშვნელობას. უნგრეთის მხარემ აღგვითქვა, რომ პარლამენტი საქართველო-ევროკავშირს შორის ასოცირების შესახებ შეთანხმების რატიფიცირებას წლის ბოლომდე მოახდენს. ასევე, ხაზი გაესვა საქართველოს პროგრესს დემოკრატიზაციისა და რეფორმების განხორციელების კუთხით, რამაც განაპირობა ევროკავშირსა და ნატო-ში ინტეგრაციის პროცესში საქართველოს მიერ მიღწეული წარმატებები. უნგრეთის საგარეო საქმეთა და ვაჭრობის მინისტრის მოადგილემ დაადასტურა მხარდაჭერა საქართველოს სუვერენიტეტისა და ტერიტორიული მთლიანობისადმი და ასევე ევროპულ და ევრო-ატლანტიკურ სტრუქტურებში ინტეგრაციის გზაზე. 31.10.14