ჟენევაში გამართულ ადამიანის უფლებათა დაცვისა და ხელშეწყობის ეროვნული ინსტიტუტების საერთაშორისო საკოორდინაციო კომიტეტის 26-ე შეხვედრაზე, ადამიანის უფლებათა დაცვის ეროვნული ინსტიტუტების რეგიონული ჯგუფების შეხვედრის ფარგლებში, საქართველოს სახალხო დამცველის ინსტიტუტი აირჩიეს ევროპის ადამიანის უფლებათა დაცვის ეროვნული ინსტიტუტების ჯგუფის საკოორდინაციო კომიტეტის წევრად 3 წლის ვადით.
აღნიშნული კომიტეტი ხელს უწყობს ევროპის ადამიანის უფლებათა დაცვის ეროვნულ ინსტიტუტებს ადგილობრივ დონეზე გააუმჯობესონ ადამიანის უფლებათა დაცვის მონიტორინგი, სწავლობს ადგილობრივ გამოწვევებს ადამიანის უფლებათა დაცვის კუთხით, აძლიერებს ინსტიტუტების როლს ადამიანის უფლებათა დაცვისა და ხელშეწყობის თვალსაზრისით. კომიტეტი ასევე ხელს უწყობს საერთაშორისო სტანდარტების იმპლემენტაციას ეროვნულ დონეზე.
საქართველოს სახალხო დამცველის ინსტიტუტის არჩევა ევროპის ადამიანის უფლებათა დაცვის ეროვნული ინსტიტუტების ჯგუფის საკოორდინაციო კომიტეტის წევრად ხაზს უსვამს ევროპული ადამიანის უფლებათა ინსტიტუციების მაღალ ნდობას საქართველოს სახალხო დამცველის აპარატის მიმართ და კომიტეტის წევრობა კიდევ უფრო მეტ საშუალებას მისცემს საქართველოს ომბუდსმენის ოფისს ადამიანის ძირითად უფლებათა და თავისუფლებათა დაცვის ეფექტური ღონისძიებების გატარებაზე და ხელს შეუწყობს ადამიანის უფლებათა ევროპული სტანდარტების დანერგვას, აცხადებენ სახალხო დამცველის აპარატში.
08.05.13
