6 და 7 ნოემბერს, 19:00 საათზე, საქართველოს კულტურისა და ძეგლთა დაცვის სამინისტროს მხარდაჭერით ნოდარ დუმბაძის სახელობის მოზარდმაყურებელთა თეატრში გაიმართება რეჟისორ ლილი ბურბუთაშვილის სპექტაკლის „რექვიემი“ პრემიერა.
„რექვიემს“ საფუძვლად დაედო ცნობილი თეატრის კრიტიკოსისა და ისტორიკოსის ვასილ კიკნაძის ნაშრომი „ წამებული რაინდები“, სადაც აღწერილია გასული საუკუნის 30-იანი წლების რეპრესიები – საქართველოსთვის ეს მნიშვნელოვანი პერიოდი აქამდე არცერთ ქართულ თეატრალულ სცენაზე არ გაცოცხლებულა. ლილი ბურბუთაშვილის მხატვრულ-დოკუმენტურ დრამაში წარმოდგენილია ყველა ის ფაქტი, რომელზეც დღემდე მხოლოდ კულუარულად საუბრობდნენ.
კულტურის სამინისტროს ინფორმაციით, ნოდარ დუმბაძის სახელობის მოზარდმაყურებელთა სახელმწიფო თეატრი მხატვრულ-დოკუმენტურ დრამას იმ დიდ ქართველ თეატრალულ მოღვაწეთა ხსოვნას უძღვნის, რომელთაც სიცოცხლე შესწირეს სამშობლოსა და ხელოვნების სამსახურს. სპექტაკლის მთავარი გმირები არიან დიდი ქართველი რეჟისორი სანდრო ახმეტელი და რუსთაველის თეატრის მთავარი შემოქმედებითი ბირთვი, ისინი ვინც 1937 წლის ბოლშევიკურ ტერორს ემსხვერპლნენ.
ორმოქმედებიანი სპექტაკლის დადგმის, მუსიკალური გაფორმების და ინსცენირების ავტორი თავად რეჟისორი ლილი ბურბუთაშვილია, მხატვარი – მაია სხირტლაძე, ქორეოგრაფი კი ცისია ჩოლოყაშვილი.
სპექტაკლში მონაწილეობენ : ვანო დუგლაძე, ნუგზარ ყურაშვილი, სოსო მოლოდინაშვილი, რაჟდენ კერვალიშვილი, ვასილ ამურველაშვილი, გიორგი კაჭახიძე, ზვიად ურიდია, ირაკლი გოგოლაძე, ნინო არჩაია, სალომე მსაისაშვილი, სოფო ახუაშვილი, ლაშა გრძელიძე, პაატა კიკვაძე და ცოტნე საგინაძე.
სპექტაკლი საქართველოს კულტურისა და ძეგლთა დაცვის სამინისტროსა და მერიის კულტურული ღონისძიებების ცენტრის ფინანსური მხარდაჭერით დაიდგა.
06.11.14
