საქართველოს საგარეო საქმეთა მინისტრის თამარ ბერუჩაშვილის განცხადებით, დიალოგის ნებისმიერი ფორმატი ყველა სახელმწიფოსთან, განსაკუთრებით რუსეთთან და განსაკუთრებით დღეს უნდა ემსახურებდეს ქართული სახელმწიფოს ინტერესებს.
ამის შესახებ თამარ ბერუჩაშვილმა საგარეო საქმეთა სამინისტროში ესტონელ კოლეგა კეიტ პენტუს-როსიმანნუსთან გამართულ ერთობლივ პრესკონფერენციაზე განაცხადა. თამარ ბერუჩაშვილი რუსეთის პრეზიდენტ ვლადიმერ პუტინის გუშინ გაკეთებულ განცხადებას გამოეხმაურა, რომელიც საქართველოს ხელისუფლების წარმომადგენლებთან შეხვედრას ეხებოდა.
“ვინ, სად, როგორ, რატომ ამაზე უნდა ჩამოყალიბდეს პოზიცია, უნდა შეჯერდეს მიდგომები. საგარეო საქმეთა სამინისტრო ამ ეტაპზე ამ საკითხზე არ მუშაობს. ჩვენ ჩართული ვართ ჟენევის მოლაპარაკებების ფორმატში, არსებობს აბაშიძე-კარასინის დიალოგი, რომელიც დღეს არის გარკვეული პაუზის რეჟიმში, რადგან არ არის დათქმული მორიგი შეხვედრის დრო. ვისურვებდი, მოსკოვიდან ისეთი მესიჯები ყოფილიყო, რომელიც არ შეეწინააღმდეგებოდა საერთაშორისო სამართალს და იმ უნივერსალურ ღირებულებს, იმ ხელშეკრულებებს და დეკლარაციებს, რომლის ხელმომწერი თვითონ რუსეთი არის”, – განაცხადა თამარ ბერუჩაშვილმა და აღნიშნა, რომ სამწუხაროდ, ასეთი მესიჯები მოსკოვიდან არ ჩანს.
“თუ საქართველოს ხელისუფლება ჩათვლის შესაძლებლად, მოხარული ვიქნებით, საქართველოს მთავრობის ნებისმიერი წარმომადგენელი, იქნება ეს პრემიერი თუ პრეზიდენტი, მოსკოვში ვიხილოთ”, – ამის შესახებ რუსეთის პრეზიდენტმა ვლადიმერ პუტინმა გუშინ, მოსკოვში გამართულ ყოველწლიურ პრესკონფერენციაზე ტელეკომპანია “მაესტროს” ჟურნალისტის მიერ დასმულ შეკითხვაზე პასუხის გაცემისას განაცხადა.
19.12.14
