რელიგიური გაერთიანებები 17 მაისს დაგეგმილი სექსუალური უმცირესობების აქციასთან დაკავშირებით განცხადებას ავრცელებენ. როგორც სხვადასხვა რელიგიური მიმდინარეობის გაერთიანებების განცხადებაშია აღნიშნული, ქვეყანაში სადაც მოსახლეობის აბსოლუტური უმრავლესობა იმ ტრადიციული რელიგიების მიმდევარია, რომლის მოძღვრების მიხედვით ერთსქესიან ადამიანთა სქესობრივი ურთიერთობები ცოდვად მიიჩნევა, მსგავს პროპაგანდისტულ აქციებთან დაკავშირებით, საზოგადოებას ლეგიტიმური უფლება აქვს მშვიდობიანი, არაძალადობრივი ფორმით გამოხატოს პროტესტი.
„მიგვაჩნია, რომ გამოხატვის თავისუფლება დემოკრატიული საზოგადოების ერთ-ერთ უმთავრესი დასაყრდენია, ხოლო მისი უზრუნველყოფა – საზოგადოებრივი დემოკრატიული პროცესების წარმატებით წარმართვის აუცილებელ პირობა. ეს თავისუფლება ერთის მხრივ ინდივიდის თვითრეალიზაციის საშუალება, ხოლო მეორეს მხრივ საზოგადოებისათვის საჭირბოროტო თემებზე აზრის გამოთქმის, დისკუსიების, დებატების გზით შეთანხმების მიღწევისა და საზოგადოების განვითარების წინაპირობაა. დემოკრატიული საზოგადოებისათვის ასევე ფასეულია შეკრებების თავისუფლების უზრუნველყობა, რომელიც გამოხატვის რეალიზების ერთ-ერთი საშუალებაა“, – ნათქვამია განცხადებაში.
აქვე, როგორც რელიგიური გაერთიანებები აცხადებენ, გამოხატვის, ასევე შეკრების თავისუფლება არ წარმოადგენს აბსოლუტურს და იგი რიგი პირობების შედეგად შეიძლება შეიზღუდოს.
„საქართველოს კონსტიტუცია, ისევე როგორც ადამიანის უფლებათა ევროპული კონვენცია თუ სხვა საერთაშორისო დოკუმენტები ამომწურავად მიუთითებენ იმ პირობებს რომლის დროსაც შეიძლება შეზღუდული იყოს იგი. სხვასთან ერთად ესენია უწესრიგობისა და დანაშაულის აღკვეთა, საზოგადოებრივი წესრიგის დაცვა, დანაშაულის თავიდან აცილება, სხვათა უფლებებისა და ღირსების დაცვა, ჯანმრთელობისა და მორალის დაცვა. ზემოაღნიშნულში ორი ფასეულობის – რელიგიისა და გამოხატვის თავისუფლების კონფლიქტიც მოიაზრება“, – აცხადებენ რელიგიური გაერთიანებები.
ამასთან, განცხადებაში აღნიშნულია, რელიგიური გრძნობების შეურაცხყოფისა თუ მორალურ კრიტერიუმებთან დაკავშირებულ საქმეებში ევროპული სასამართლო ყოველთვის ეროვნულ სასამართლოებს უტოვებს შეხედულების საკმაოდ ფართო არეს, რათა მათ საკუთარი ქვეყნის თავისებურებებიდან გამომდინარე დაადგინონ, თუ სად გადის ეს ზღვარი და რას მოითხოვს საზოგადოებრივი ინტერესი. რელიგიური გაერთიანებების განცხადებით, როგორც წესი ეს დავა მორალის, საზოგადოებრივი ზნეობისა თუ რელიგიური გრძნობების სასარგებლოდ წყდება.
„სამწუხაროდ, გასულ წელს, ჩვენ მომსწრენი გავხდით არაერთი უხამსი და საზოგადოებრივი მორალისათვის შეუფერებელი ქმედებისა, რომელთაც ადგილი ჰქონდათ არასრუსწლოვანთა თვალწინ. იმედია, წელს მსგავს მოვლენებს არ ექნება ადგილი.
ყოველი ადამიანის პირადი ცხოვრება არის ხელშეუხებელი. ამასთან, მოვუწოდებთ აქციის მონაწილეებს საჯაროდ, საზოგადოებრივი თავშეყრის ადგილებში თავიანთი სექსუალური ორიენტაციის დემონსტრირებისა და პროპაგანდისაგან თავი შეიკავონ, რადგან ამგვარი ქმედება საზოგადოებრივი მორალისათვის არის მიუღებელი“, აცხადებენ რელიგიური გაერთიანებები.
განცხადებას, რომელსაც საპატრიარქო ავრცელებს, ხელს აწერენ:
საქართველოს სამოციქულო ავტოკეფალური მართლმადიდებელი ეკლესია; ამიერკავკასიის მუსულმანთა სამმართველო; სრულიად საქართველოს მუსლიმთა სამმართველო; სომეხთა სამოციქულო წმინდა მართლმადიდებელი ეკლესიის ეპარქია; ამიერკავკასიის კათოლიკეთა სამოციქულო ადმინისტრაცია; ევანგელურ–ლუთერანული ეკლესია საქართველოში; ევანგელურ-ბაპტისტური ეკლესია; მეშვიდე დღის ქრისტიან – ადვენტისტთა ეკლესია საქართველოში; ხსნის არმია საქართველოში.
16.05.13
