ნატო-სთან საქართველოს ურთიერთობა დინამიურად და წარმატებულად მიმდინარეობს, – ამის შესახებ თავდაცვის მინისტრმა, მინდია ჯანელიძემ ჟურალისტებს ნატო-ს გენერალური მდივნის მოადგილესთან გამართული შეხვედრის შემდეგ განუცხადა.
მისი თქმით, ნატო საქართველოს ურთოერთობა და თანამშრომლობა ამ რეჟიმში უნდა გაგრძელდეს.
“ნატო-სთან ურთიერთობა მიმდინარეობს დინამიურად და წარმატებულად. უელსის სამიტზე მიღებული არსებითი პაკეტის იმპლემენტაციის პროცესი დაწყებულია. ჩვენ ამ რეჟიმში უნდა გავაგრძელოთ ურთიერთობა და თანამშრომლობა ნატო-სთან, რომ საზოგადოებამ და, რაც მთავარია, საქართველოს შეიარაღებულმა ძალებმა დაინახოს კონკრეტული პოზიტიური შედეგები ნატო-საქართველოს ურთიერთობაში. რაც შეეხება დღევანდელ შეხვედრას, შეხვედრა იყო ძალიან მნიშვნელოვანი და განსაკუთრებული ყურადღება დაეთმო ნატო-საქართველოს არსებით პაკეტს.
ჩვენი აპარატი ნატო-ს შტაბბინასთან ყოველდღიურ რეჟიმში მუშაობს იმისთვის, რომ განხორციელდეს სამოქმედო გეგმის კონკრეტული ინიციატივები, განისაზღვროს თითოეული ინიციატივის განხორციელების დრო და პირობები. ამ საკითხებთან დაკავშირებით უფრო მეტად ნათელი წარმოდგენა გვექნება ნატო-ს მინისტერიალის შემდეგ, რომელიც თებერვლის დასაწყისში გაიმართება”, – განაცხადა ჯანელიძემ.
