მინსკის მოლაპარაკებებზე მიღებული დოკუმენტი გამოქვეყნდა. ინფორმაციას უკრაინული სააგენტო Unian.net-ი ავრცელებს. დოკუმენტი 11 პუნქტისგან შედგება და მათში ცეცხლის შეწყვეტისა და ბუფერული ზონის შემქნის მექანიზმებზეა საუბარი.
დოკუმენტში ასევე წერია, რომ ცეცხლის შეწყვეტისა და მძიმე შეიარაღების გაყვანის მონიტორინგს ეუთო განახორციელებს. ასევე ნათქვამია, რომ ეუთო ამისთვის ყველანაირ ტექნიკურ საშუალებას, მათ შორის უპილოტო საფრენ აპარატებსა და თანამგზავრებისგან მიღებულ ინფორმაციას გამოიყენებს.
შეთანხმების მიხედვით, უკრაინამ და სეპარატისტებმა შეიარაღებული დანაყოფები ერთმანეთისგან თანაბარი მანძილით – 50 კმ-ით უნდა დაწიონ უკან. არტილიერია, რომლის კალიბრი 100მმ-ზე მეტია, კონფლიქტის ზონიდან 70 კმ-ით უნდა დაშორდეს, ხოლო ზალპური ცეცხლის რეაქტიული სისტემები „ტორნადო“, „სმერჩი“ და „ურაგანი“, ასევე ტაქტიკური სარაკეტო სისტემა „ტოჩკა“ – 140 კმ-ით.
შეთანხმების მე-4 პუნქტი ითვალისწინებს დონეცკის და ლუგანსკის კონფლიქტის ზონებში ადგილობრივი არჩევნების ჩატარებას. არჩევნები უკრაინული კანონმდებლობით ჩატარდება. მე-5 პუნქტი კი, პრორუსი სეპარატისტების ამნისტიას ითვალისწინებს.
დოკუმენტი ითვალისწინებს დონეცკისა და ლუგანსკის რაიონებისთვის სოციალური დახმარებების აღდგენას, რომელიც რამდენიმე დღის წინ კიევმა შეაჩერა. ასევე, უნდა აღდგეს საბანკო საქმიანობა ამ რეგიონებში. როგორც დოკუმენტში წერია, ამისთვის შესაძლოა საერთაშორისო მექანიზმებიც შეიქმნას. ამ თემასთან დაკავშირებით, საფრანგეთმა და გერმანიამ დახმარების მზადყოფნა გამოთქვეს.
საინტერესოა დოკუმენტის მე-9 პუნქტი, სადაც საუბარია უკრაინელი მესაზღვრეების მიერ რუსულ-უკრაინულ საზღვარზე კონტროლის აღდგენის შესახებ. როგორც დოკუმენტში წერია, ეს უნდა მოხდეს ამ რეგიონებში არჩევნების ჩატარების შემდეგ პირველივე დღიდან. ასევე, ამისთვის საჭიროა მე-11 პუნქტის შესრულება, რომელიც ითვალისწინებს უკრაინაში საკონსტიტუციო რეფორმის გატარებას.
მინსკის მოლაპარაკებები 14 საათის შემდეგ დღეს დილით დასრულდა. მხარეებმა დოკუმენტი შეათანხმეს და განსახილველად საკონტაქტო ჯგუფს გადასცეს. დოკუმენტს სწორედ საკონტაქტო ჯგუფის დონეზე უნდა მოეწეროს ხელი. თუმცა, შეხვედრა მას შემდეგ განახლდა, რაც დონეცკელი და ლუგანსკელი სეპარატისტების ლიდერებმა „ნორმანდიული ოთხეულის“ მიერ მიღებული სამშვიდობო შეთანხმების ხელმოწერაზე უარი თქვეს.
პირველად, განცხადება ვლადიმერ პუტინმა გააკეთა, რომლის მიხედვითაც ცეცხლის შეწყვეტის რეჟიმი 15 თებერვლიდან ამოქმედდება.
