თბილისის საკრებულოს უმცირესობის წევრი თემურ გრიგალაშვილი საკრებულოს სარევიზიო კომისიას პროცედურების დარღვევით მოქმედებაში ადანაშაულებს.
როგორც “თბილისი თაიმსს” “ნაციონალური მოძრაობიდან” აცნობეს, საქმე ეხება, ამჟამად ერთ-ერთი არასამთავრობო ორგანიზაციის ხელმძღვანელის, კრწანისის რაიონის ყოფილი გამგებლის ხათუნა ბერძენიშვილის პერიოდში გაწეული ხარჯების შემოწმებას.
თემურ გრიგალაშვილის თქმით, სარევიზიო კომისიას ამ კუთხით გაკეთებული დასკვნები თავდაპირველად საკრებულოს კომისიის სხდომაზე უნდა წარედგინა, თუმცა, ეს ასე არ მომხდარა და ანტიკორუფციულმა სამსახურმა საკითხის შესწავლა პროცედურების დარღვევით დაიწყო.
მისივე თქმით, სარევიზიო კომისიის თანამშრომლების მხრიდან იკვეთება დანაშაულებრივი ქმედება, რომელიც გამოიხატება სამსახურებრივ გულგრილობაში ან/და ფაქტების გაყალბების მცდელობაში.
მისივე თქმით, გამოიკვეთა სარევიზიო კომისიის წევრების მხრიდან შერჩევითი სამართლის ფაქტები. “ყოველივე ეს კი ნათლად ადასტურებს, რომ სარევიზიო კომისიის უმრავლესობა პოლიტიკურ დაკვეთას ასრულებს”, – აცხადებს გრიგალაშვილი.
