მთავრობასა და ბიზნესს შორის კონსულტაციები გრძელდება. ბიზნეს ასოციაციასთან შეხვედრის შემდეგ, დღეს ფინანსთა მინისტრმა ნოდარ ხადურმა შეხვედრა გამართა ნავთობპროდუქტების სექტორის წარმომადგენლებთან.
ფინანსთა სამინისტროს ინფორმაციით, შეხვედრაზე განიხილეს ფინანსთა სამინისტროს მხრიდან დარგის განვითარებისა და ხელშეწყობისთვის განხორციელებული საკანონმდებლო ინიციატივები, რომელიც უკავშირდება ბუნებრივი დანაკარგების შესახებ კანონის მიღებას, ასევე ახალი ინიციატივები დარგში აღრიცხვიანობის მოწესრიგების პროცედურების გამარტივების მიმართულებით. ფინანსთა სამინისტროს წარმომადგენლებმა მოისმინეს ის შენიშვნები და წინადადებები, რომელიც ამ კუთხით აქვთ ნავთობიმპორტიორებს.
როგორც ფინანსთა მინისტრმა განაცხადა, ნავთობპროდუქტების სექტორი მნიშნელოვანია ქვეყნის ეკონომიკის განვითარებისათვის და სახელმწიფო ბიუჯეტში ერთ-ერთი ყველაზე მსხვილი გადამხდელია, ამდენად აუცილებელია, გადაწყვეტილებების მიღების დროს ერთის მხრივ, გათვალისწინებული იყოს ბიზნესის ინტერესები, მეორეს მხრივ, დაცული იყოს მომხმარებელთა უფლებები.
