დღეს ჯანსუღ კახიძის სახელობის მუსიკალურ დარბაზში გამართულ კონცერტზე ბარიტონმა სიმონ ჩაჩანიძემ გულის შეტევა მიიღო. სასწრაფო დახმარების ბრიგადის დახმარებით, ამ წუთებში სიმონი ინგოროყვას კლინიკის კარდიოლოგიურ განყოფილებაშია მოთავსებული და გამოკვლევებს გადის. როგორც ექიმები აცხადებენ, პაციენტის მდგომარეობა სტაბილურია, თუმცა ის გამოკვლევებისთვის 2 დღის განმავლობაში რეანიმაციულ განყოფილებაში იქნება მოთავსებული.
სიმონ ჩაჩანიძე სახელმწიფო კონსერვატორიის მესამე კურსის სტუდენტი და თვითმმართველობის თავმჯდომარეა. მიუხედავად სტუდენტობისა ის სხვადასხვა დროს არაერთი საქველმოქმედო კონცერტის ორგანიზატორი ყოფილა და თავად, როგორც ხელოვანს, მიუღია სხვადასხვა აქცია-ღონისძიებებში მონაწილეობა. სიმონ ჩაჩანიძე და მისი ოჯახი განსაკუთრებით გამოირჩევა ქართული კულტურის ქომაგობითა და სხვადასხვა კულტურილი ღონისძიებების ორგანიზებით. ბოლო დროს, მის წარმატებაზე ბევრი საუბრობს. ის გულიკო კარიაულის კლასის აქტიური მოსწავლეა.
აღნიშნულ ფაქტთან დაკავშირებით ინფორმაცია, ვიდეო და ფოტო მასალა სიმონის მეგობრებმა მოგვაწოდეს. როგორც სიმონის მეგორბები თბილისი თაიმსთან საუბარში აღნიშნავენ “სიმონს კონცერტზე გამოსვლამდე ჰქონდა მძიმე სტრესული ფონი. აქვს სერიოზული ფინანსური პრობლემები. მას, როგორც სპეციალისტები ამბობენ, ძალიან დიდი პოტენციალი აქვს და შეუძლია ქართული სახელი საამაყოდ გაიტანოს მსოფლიოში. თუმცა, ამ პოტენციალის რეალიზებისთვის ელემენტარული პირობების შექმნა და ყურადღებაა საჭირო. ალბათ, ეს ყველა პრობლემა ერთად მოაწვა, როცა სცენაზე ავიდა. ამბობდა, რომ ცუდად იყო თუმცა ეს სერიოზულად და მნიშვნელოვნად არავინ მივიღეთ. თქვენ რომ ნახოთ როგორ დაიწყო შესრულება, ალბათ იამაყებდით. თუმცა, ახლა ცუდად დამთავრდა… იმედია ყველაფერი კარგად იქნება და შეძლებს სიმონი მიაღწიოს დასახულ მიზანს” აცხადებენ თბილისი თაიმსთან საუბარში სიმონის მეგორბები.
“კახიძის დარბაზში” გამართული კონცერტი მის კარიერაში ერთ-ერთი გადამწყვეტი და მნიშვნელოვანი ნაბიჯი უნდა გამხდარიყო. სიმონ ჩაჩანიძე ბარიტონია და ის დღეს ასრულებდა ჟერმონის არეას ოპერიდან “ტრავიატა”.
