საქართველოს მთავრობის ადმინისტრაციის უფროსი მაია ცქიტიშვილი უკრაინის მინისტრთა კაბინეტისა და პრემიერ-მინისტრის აპარატის უფროს ანა ონიშჩენკოს შეხვდა.
როგორც ცქიტიშვილმა ჟურნალისტებს უკრაინელ კოლეგასთან შეხვედრის შემდეგ განუცხადა, საუბარი საქართველოში გატარებულ რეფორმებსა და ამ კუთხით გამოცდილების გაზიარებას შეეხო.
“გვქონდა ძალიან კარგი შეხვედრა. ჩემი უკრაინელი კოლეგა საქართველოში ჩამოსულია, რომ გავუზიაროთ გამოცდილება, მეორე მხრივ, ჩვენც გავიგოთ, რა მიმართულებებით მუშაობენ უკრაინელი კოლეგები. ძალიან საინტერესო საუბარი გვქონდა. მოგეხსენებათ, ბოლო ორი წლის განმავლობაში ბევრი ცვლილება განვახორციელეთ, როგორც ადმინისტრაციაში, ისე მთლიანად სახელმწიფო სტრუქტურებში. ვფიქრობ, საინტერესოა ჩვენი უკრაინელი კოლეგებისთვის, გაიგონ, რა შევცვალეთ და რა ცვლილებებია აუცილებელი ევროინტეგრაციის გზაზე. იცით, რომ ჩვენ უფრო მეტი გამოცდილება გვაქვს ამ მიმართულებით”, – განაცხადა მაია ცქიტიშვილმა.
მისივე განმარტებით, უკრაინელ კოლეგას შესთავაზა საქართველოს მთავრობის ადმინისტრაციის სრული მხარდაჭერა და თანამშრომლობა.
“იმედი გვაქვს, რომ ეს თანამშრომლობა აქტიური იქნება”, – აღნიშნა საქართველოს მთავრობის ადმინისტრაციის უფროსმა. –
