მთავრობის სხდომის დასრულების შემდეგ იუსტიციის მინისტრი თეა წულუკიანი პრეზიდენტ გიორგი მარგველაშვილის პარლამენტში გუშინდელ მოხსენებას გამოეხმაურა, მან პრეზიდენტთან უფრო მეტი კონტაქტის და კომუნიკაციის აუცილებლობაზე ისაუბრა.
“ეს ალბათ პრეზიდენტის ხარვეზიც არის და ჩვენი ხარვეზიც, რომ როგორც ჩანს, ინფორმაციის გაცვლის უფრო მეტი არარსებობა პრეზიდენტს აკეთებინებს ისეთ კომენტარებს, რომელიც მინისტრებს მოგვეჩვენა, რომ არის ან მოძველებულ ინფორმაციებზე დაყრდნობით გაკეთებული შეფასება, ან უსაფუძვლო. მაგალითად, ახალი მიგრაციის პოლიტიკაზე პრეზიდენტის მიერ ითქვა, რომ ეს არის ელემენტარული შეცდომა. ელემენტარული შეცდომა ვერ იქნება ახალი საემიგრაციო პოლიტიკა, რომელიც დაინერგა ევროკავშირთან ვიზალიბერალიზაციის სამოქმედო გეგმის ფარგლებში.მთლიანობაში, მე რა თქმა უნდა, ყურადღებით ვუსმენ პრეზიდენტს, როგორც პარლამენტში, ისე შემდგომ პროცესში”, – აცხადებს თეა წულუკიანმა.
მინისტრის თქმით, ეს კიდევ ერთხელ მოწმობს, რომ აუცილებელია უფრო მეტი კონტაქტი, მათ შორის, მანამდე, სანამ გაკეთდება განცხადებები და შეფასებები.
ასევე მინისტრ წულუკიანის განცხადებით, საზღვარზე ვიზის აღების პრაქტიკა არ აღდგება, თუკი ჩვენ გვინდა ვიყოთ ევროპული სივრცის ნაწილი, – ამის შესახებ თეა წულუკიანმა მთავრობის სხდომის დასრულების შემდეგ გამართულ პრესკონფერენციაზე განაცხადა.
მისი თქმით, ეს ევროკავშირის მოთხოვნაც იყო და ამის შესახებ ძალიან ბევრმა ევროპელმა ექსპერტმა გასცა რეკომენდაცია. როგორც თეა წულუკიანმა აღნიშნა, საზღვარზე შეუძლებელია პიროვნების სრულყოფილად შემოწმება.
“ამიტომ ეს ვერ აღდგება, თუკი ჩვენ გვინდა, რომ გავხდეთ უვიზო მიმოსვლის სივრცის ნაწილი ევროპასთან. რაც შეეხება საიმიგრაციო პოლიტიკას, ამ პოლიტიკის შემმუშავებელი არის მიგრაციის სამთავრობო კომისია და სამი წამყვანი უწყება, კერძოდ, შინაგან საქმეთა სამინისტრო, იუსტიციის სამინისტრო და საგარეო საქმეთა სამინისტრო,მიგრაციის პოლიტიკა ჩვენ შევიმუშავეთ ძალიან პროფესიონალ, ძალიან მომთხოვნ, ძალიან მკაცრ ევროპელ ექსპერტებთან ერთად. მათი ჩამოსვლა ყოველთვის ჰგავს ჩვენს გამოცდას. სამწუხაროა, რომ ეს დახურული პროცესია, მე ძალიან მინდა ხოლმე ამას ესწრებოდეთ თქვენ, მედია. იმიტომ, რომ ეს არის ერთგვარად მასწავლებლისა და მოსწავლის გამოცდის მსგავსი პროცესი. ამიტომ ვინც ამაში არ არის უშუალოდ ჩართული, მათთვის, მათ შორის, პრეზიდენტისთვის თუ მედიის წარმომადგენლებისთვის, უფრო მარტივია კომენტარების გაკეთება. მერწმუნეთ, რომ ის სამი მინისტრი, ვინც პასუხს ვაგებთ მიგრაციის პოლიტიკაზე, თავით ვაგებთ პასუხს იმაზე, რომ შემუშავებული პოლიტიკა არის მკაცრად შესაბამისობაში ევროპულ სტანდარტებთან”- განმარტა წულუკიანმა.
მისივე თქმით, შინაგან საქმეთა სამინისტრო აკონტროლებს მიგრაციის ნაკადებს და საზღვრებს, საგარეო საქმეთა სამინისტრო პასუხისმგებელია ვიზებზე, ხოლო იუსტიციის სამინისტრო პასუხისმგებელია ბინადრობებზე და მოქალაქეობაზე.
ნინა პირტახია
