“ეროვნული ბანკი არაადეკვატურად იქცევა”

 „დღესაც მაქვს ეჭვი, რომ ეროვნული ბანკი არაადეკვატურად იქცევა, მაგრამ ჩემი ეჭვები არ არის ერთადერთი და ცალმხრივი. ბევრი ექსპერტი გამოთქვამს ეჭვს. მე არ ვკარნახობ, თუ რა უნდა გააკეთოს ეროვნულმა ბანკმა, მაგრამ მე ვფიქრობ, რომ მის მიმართ სერიოზული კითხვებია“, – განაცხადა ივანიშვილმა.

კითხვაზე, ეროვნული ბანკის მიმართ გამოთქმული კრიტიკული შენიშვნები ხომ არ მოქმედებს ბანკის რეიტინგზე და ზოგადად, ხომ არ აზარალებს ქვეყანას, ყოფილმა პრემიერმა უპასუხა, რომ ეს ასე არ არის.

„რატომ გგონიათ, რომ ნებისმიერ საჯარო პიროვნებაზე, ორგანიზაციაზე, ნებისმიერმა პიროვნებამ რომ გამოთქვას კრიტიკული შენიშვნა, თუნდაც არგუმენტირებული, ეს ამ სტრუქტურას აკნინებს? ასე უნდა დავსვათ კითხვა, რომ თუ ვინმემ გააკრიტიკა ან ეჭვი გამოთქვა ნებისმიერი სტრუქტურის ფუნქციონირებაზე და ნებისმიერი ჩინოვნიკის გადაწყვეტილებაზე, ეს მას აკნინებს? ესაა დემოკრატია?“, – განაცხადა ივანიშვილმა.

კითხვაზე, ლარის სტაბილურობა არის პრიორიტეტი თუ ეკონომიკური ზრდა, ივანიშვილმა აღნიშნა, რომ ესენი ერთმანეთთან კავშირშია.

„თუ ზედმეტ, ჭარბ ლარს ამოიღებს მიმოქცევიდან ეროვნული ბანკი, ამან შეიძლება ზრდას ხელი შეუშალოს და ა.შ. გამოსავალი სად არის, ეს სტრუქტურებმა უნდა დადგინონ, მე ამას ვერ დავადგენ“, – აღნიშნა ყოფილმა პრემიერმა.