საქართველოს რეგიონული განვითარებისა და ინფრასტრუქტურის სამინისტროში მინისტრმა დავით ნარმანიამ და საქართველოს სტატისტიკის ეროვნული სამსახურის აღმასრულებელმა დირექტორმა, ზაზა ჭელიძემ ერთობლივი პრესკონფერენცია გამართეს.
პრესკონფერენციაზე წარმოდგენილი იყო დეტალური ინფორმაცია, თუ კონკრეტულად რას მოიცავს აღწერის პირველი ეტაპი და სად განხორციელდება იგი.
„მოსახლეობის აღწერის მსოფლიოში გავრცელებული მეთოდოლოგიის გათვალისწინებით, მოსახლეობის საყოველთაო აღწერის განხორციელებისთვის აუცილებელია შენობებისა და მათში ფაქტიურად მცხოვრები ოჯახების წინასწარი სიების შედგენა. ოჯახების სიების დადგენა საქართველოს ყველა სოფელსა თუ ქალაქს მოიცავს“, – აცხადებს დავით ნარმანია.
აღნიშნული სამუშაოების პირველი ნაწილი რეგიონების მიხედვით ჩატარდება:
2013 წლის 1-14 ივლისი – აჭარა, გურია
2013 წლის 16 – 30 ივლისი – კახეთი
2013 წლის ნოემბრის თვიდან ოჯახების წინასწარი სიების შედგენა გაგრძელდება საქართველოს სხვა რეგიონებში.
2013 წლის 2 აპრილს საქართველოს მოსახლეობის აღწერის საკოორდინაციო სამთავრობო კომისიამ პირველ სხდომაზე საქართველოს მოსახლეობის 2014 წლის საყოველთაო აღწერის პროგრამა და სამოქმედო გეგმა დაამტკიცა.
კომისიის გადაწყვეტილებით, მოსახლეობის აღწერა უნდა ჩატარდეს 2014 წლის 5-19 ნოემბერს. კომისიის თავჯდომარეა საქართველოს რეგიონული განვითარების და ინფრასტრუქტურის მინისტრი დავით ნარმანია. მოსახლეობის საყოველთაო აღწერის პროცესის განხორციელებაზე პასუხისმგებელია საქსტატი.
21.06.13
