რუსეთ-საქართველოს 2008 წლის აგვისტოს ომის 7 წლისთავთან დაკავშირებით საქართველოს ელჩი გაერო-ში კახა იმნაძე გაერო-ს გენერალურ მდივანს ბან კი-მუნს შეხვდა.
საქართველოს საგარეო საქმეთა სამინისტროს მიერ გავრცელებული ინფორმაციით, შეხვედრის ფარგლებში განიხილეს – რუსეთ-საქართველოს ომის შემდგომი პოლიტიკური და ჰუმანიტარული ვითარება, რუსეთის ფედერაციის პოლიტიკა საქართველოს მიმართ 2008 წლის ომის შემდგომ, ასევე, რუსეთის ფედერაციის მხრიდან ცეცხლის შეწყვეტის 6-პუნქტიანი შეთანხმების დარღვევის ფაქტები. ხაზი გაესვა იმას, რომ საქართველოსგან განსხვავებით, რუსეთის ფედერაცია კვლავაც არ ასრულებს შეთანხმების ხელმოწერით აღებულ ვალდებულებებს.
საქართველოს ელჩმა გენერალურ მდივანს ინფორმაცია მიაწოდა, რუსეთის მიერ აფხაზეთისა და ცხინვალის რეგიონის მიმართ წარმოებული ფაქტობრივი ანექსიის პოლიტიკის შესახებ. კახა იმნაძემ ასევე ისაუბრა საოკუპაციო ხაზის გასწვრივ მავთულხლართებისა და “საზღვრის” აღმნიშვნელი ბანერების დამონტაჟების პროცესისა და მისი შედეგების თაობაზე.
“მხარეებმა დაადასტურეს ჟენევის საერთაშორისო მოლაპარაკებების არსებული ფორმატის მნიშვნელობა და ხაზი გაუსვეს გაერო-ს, როგორც ერთ-ერთი თანათავმჯდომარის, როლს პროცესის უფრო ეფექტურად წარმართვისათვის. შეხვედრაზე მხარეებმა ასევე ისაუბრეს ოკუპირებულ რეგიონებში ადამიანის უფლებების დაცვის კუთხით არსებული სავალალო მდგომარეობაზე და შეთანხმდნენ გაერო-ს შესაბამის სააგენტოებსა და საქართველოს მთავრობას შორის მჭიდრო თანამშრომლობის გაგრძელებაზე”, – ნათქვამია საგარეო საქმეთა სამინისტროს მიერ გავრცელებულ ინფორმაციაში.
