10 სექტემბერს, ვენაში, ადგილობრივი დროით 16:00 საათზე, საქართველოს კულტურისა და ძეგლთა დაცვის მინისტრი მიხეილ გიორგაძე და იოსეფ ოსტერმაიერი – ავსტრიის რესპუბლიკის ხელოვნების, კულტურის, საკონსტიტუციო და მედიის საკითხებში ფედერალური მინისტრი, ორ ქვეყანას შორის, კულტურის სფეროში, თანამშრომლობის მემორანდუმს მოაწერენ ხელს.
კულტურის სამინისტროს ინფორმაციით, „ურთიერთგაგების მემორანდუმი ავსტრიის რესპუბლიკის ფედერალურ კანცელარიასა და საქართველოს კულტურისა და ძეგლთა დაცვის სამინისტროს შორის ხელოვნებისა და კულტურის სფეროში თანამშრომლობის შესახებ“ ითვალისწინებს ერთობლივი პროექტების განხორციელებას მუზეუმების, კულტურული მემკვიდრეობის დაცვისა თუ კულტურის სხვადასხვა სფეროს განვითარების მიმართულებით. გარდა ამისა, ავსტრიის მხარე ქართულ მხარეს დაეხმარება კულტურის სტრატეგიის შემუშავების პროცესში. მემორანდუმის საფუძველზე, ავსტრია საქართველოს პროგრამა „შემოქმედებითი ევროპის“ მიმართულებით საკუთარ გამოცდილებასაც გაუზიარებს.
ვიზიტის ფარგლებში, ასევე, დაგეგმილია სხვადასხვა შეხვედრა კულტურის სფეროს წარმომადგენლებთან.
