საქართველოს ვიცე-პრემიერის, საგარეო საქმეთა მინისტრის გიორგი კვირიკაშვილის განცხადებით, ბელგიის სამეფოს საგარეო საქმეთა მინისტრთან დიდიე რეინდერთან შეხვედრისას, ორ ქვეყანას შორის თანამშრომლობის განვითარება და საქართველოში ბიზნესმენთა სავაჭრო მისიის ვიზიტის მომზადების საკითხები განიხილეს.
„ეს იქნება ვიზიტი, რომლის ფარგლებშიც, პოლიტიკური საკითხების გარდა, ყურადღება დაეთმობა ვაჭრობის განვითარებას, ინვესტიციების წახალისებას, ორ ქვეყანას შორის ორმხრივ ურთიერთობებს, ეს იქნება ღია დიალოგი მთელ რიგ თემებზე, მათ შორის ეფექტიან მმართველობაზე“ – განაცხადა დიდიე რეინდერმა.
ბელგიის საგარეო საქმეთა მინისტრმა კიდევ ერთხელ დაადასტურა თავისი მხარდაჭერა საქართველოს ევროპული და ევროატლანტიკური მისწრაფების მიმართ. „ბელგია ხელს შეუწობს საქართველოს ევროკავშირთან დაახლოებას და პარტნიორობას გაუწევს მას ამ პროცესში. იგივე მიდგომა გვაქვს ნატოსთან მიმართებაშიც. ჩვენ უფრო მეტი უნდა ვიმუშაოთ და არც ერთი წუთით არ უნდა შევაჩეროთ სვლა ამ მიმართულებით.“- აღნიშნა მან.
დიდიე რეინდერმა მკაფიოდ გამოხატა ბელგიის მხარდაჭერა საქართველოს ტერიტორიული მთლიანობის მიმართ და დასძინა, რომ „ევროკავშირის ყველა სხვა წევრი სახელმწიფო მხარს უჭერს საქართველოს ტერიტორიული მთლიანობას. ჩვენ ამის შესახებ გამუდმებით უნდა ვიმეოროთ და თავიდან ავირიდოთ ყველანაირი შესაძლებლობა, რაც საფრთხეს შეუქმნის საქართველოს ტერიტორიულ მთლიანობას“.
შეხვედრაზე, რომელიც საქართველოსა და ბელგიის საგარეო უწყებების ხელმძღვანელებს შორის გაიმართა, ყურადღება გამახვილდა ისეთ საერთაშორისო გამოწვევებზე, როგორიცაა უკრაინასა და სირიაში არსებული კონფლიქტები და რუსეთის როლი აღნიშნულ კონფლიქტებში. „მე მომხრე ვარ ამგვარი კონტაქტების, ღია დიალოგის, ეს სირთულეების გადაჭრის ერთადერთი გზაა, მათ შორის საქართველოშიც, ჩვენ პოლიტიკურ, და არა სამხედრო არენაზე ვართ, ამიტომ, თუ შეგვწევს ძალა ხელი შევუწყოთ სიტუაციის სტაბილიზაციას, ყველაფერი უნდა გავაკეთოთ ამისთვის“ -განაცხადა ბელგიის სამეფოს საგარეო საქმეთა მინისტრმა.
