საქართველოს ვიცე-პრემიერი საგარეო საქმეთა მინისტრი გიორგი კვირიკაშვილი აზერბაიჯანის მილი მეჯლისის თავმჯდომარეს ოქთაი ასადოვს შეხვდა. მხარეებმა აღნიშნეს ორი ქვეყნის მეგობრული ურთიერთობა, რასაც ისტორიული საფუძვლები აქვს და ასევე ხაზი გაუსვეს სტრატეგიულ პარტნიორობას და შემდგომში მისი გაღრმავების მნიშვნელობას. როგორც საქართველოს საგარეო საქმეთა მინისტრმა აღნიშნა, მისი საქმიანობის ერთ-ერთ მთავარ პრიორიტეტს სწორედ აზერბაიჯანთან არსებული სტრატეგიული ურთიერთობების კიდევ უფრო განვითარება წარმოადგენს. ამის მყარ საფუძველს იძლევა ორი ქვეყნის საერთო ინტერესები, მათი ჩართულობა მნიშვნელოვან საერთაშორისო პროექტებში. აზერბაიჯანის მილი მეჯლისის თავმჯდომარესთან შეხვედრაზე საუბარი ასევე შეეხო რეგიონში არსებულ ვითარებას, ხაზი გაესვა ქვეყნების განვითარებისთვის სტაბილურობისა და უსაფრთხოების უზრუნველყოფის მნიშვნელობას.
