რეგიონში საქართველოს მოწინავე პოზიცია აქვს ქალთა უფლებების გაძლიერების თვალსაზრისით, – ამის შესახებ ნათქვამია ამერიკა-საქართველოს სტრატეგიული პარტნიორობის ქარტიის დემოკრატიისა და მმართველობის სამუშაო ჯგუფის შეხვედრის შესახებ ერთობლივ განცხადებაში, რომელსაც ვაშინგტონი და თბილისი ავრცელებენ.
როგორც “თბილისი თაიმსს” საქართველოს საგარეო უწყებიდან აცნობეს, სამუშაო ჯგუფი ასევე აღიარებს საქართველოს მიერ გაწეულ ძალისხმევას ისეთი ინკლუზიური საზოგადოების შექმნის მიმართულებით, სადაც დაცულია ყველა ადამიანის, მათ შორის, უმცირესობათა წარმომადგენლების უფლება.
საქართველოს დელეგაციას, რომლის შემადგენლობაშიც სხვადასხვა უწყების წარმომადგენლები შედიოდნენ, საქართველოს საგარეო საქმეთა მინისტრის პირველი მოადგილე მიხეილ ჯანელიძე და იუსტიციის მინისტრის პირველი მოადგილე ალექსანდრე ბარამიძე თანათავმჯდომარეობდნენ. აშშ-ის დელეგაციას კი ევროპისა და ევრაზიის საკითხებში სახელმწიფო მდივნის თანაშემწის მოადგილე ბრიჯიტ ბრინკი, აშშ-ის საერთაშორისო განვითარების სააგენტოს ადმინისტრატორის თანაშემწის მოადგილე ჯონათან კაცი და ევრაზიის საკითხებში აშშ-ის იუსტიციის დეპარტამენტის რეგიონული ხელმძღვანელი კეთრინ ნიუკომბი ხელმძღვანელობდნენ. აშშ-ს დელეგაციაში ფართოდ იყვნენ წარმოდგენილნი სხვადასხვა სამთავრობო უწყებების წარმომადგენლები.
