“ნებისმიერ ფინანსისტს ან ეკონომისტს სთხოვეთ განგიმარტოთ, რამდენად ადეკვატური იყო კულტურის მინისტრის განცხადება”

„მინდა გთხოვოთ ნებისმიერ ფინანსისტს ან ეკონომისტს სთხოვეთ განგიმარტოთ, რამდენად ადეკვატური იყო კულტურის მინისტრის განცხადება. ჩვენ არ ვეწინააღმდეგებით ხელფასების და შრომის ანაზღაურების ზრდას. არ ვართ წინააღმდეგი, რომ პოლიციელებს, სამხედროებს, ექიმებს, მასწავლებლებს ხელფასები მოემატოთ, თუმცა, იმის წინააღმდეგები ვართ, რომ პრემიები დანამატებით ჩანაცვლდეს“, – განაცხადა თორდიამ.

მისი თქმით, როდესაც კულტურის სამინისტროში სახელმწიფო აუდიტმა კვლევა ჩაატარა, აღმოჩნდა, რომ 2015 წლის 9 თვის მონაცემით, მას შემდეგ, რაც ხელისუფლებამ პრემიების გაუქმებაზე კანონი მიიღო, სახელფასო დანამატები 2014 წლის 9 თვის მაჩვენებლებს 1 მილიონ 129 ათასით აღემატებოდა. თორდიას თქმით, ეს წინა წლის მაჩვენებლებს 604%-ით აღემატება.

აუდიტის სამსახურის უფროსმა აქვე განმარტა, რომ სამსახურს მონაცემებში არ შეუყვანია კულტურის სამინისტროში შემავალი სსიპ-ების ბიუჯეტი.

„უნდა დარეგულირდეს სახელფასო სისტემა. ასევე, უნდა დარეგულირდეს სახელფასო დანამატიც. მომხრე ვარ, რომ გაერთიანდეს, დაერქვას ხელფასი და იყოს ცნობილი, კონკრეტულ საჯარო მოხელეს ის რამდენი აქვს. არ შეიძლება დანამატი წინასწარ იყოს განსაზღვრული, რომელიმე კონკრეტულ თანამდებობის პირზე. მას შესაბამისი ახსნა-განმარტებები უნდა ახლდეს, თუ რატომ განესაზღვრა ამა თუ იმ პირს კონკრეტული თანხა“, – განაცხადა ლაშა თორდიამ.

გენერალური აუდიტორის თქმით, 2015 წლის 9 თვის მონაცემით, პრემიები 31 მილიონით არის შემცირებული, თუმცა აღსანიშნავია, რომ ამ ფონზე, სახელფასო დანამატები 45 მილიონით გაიზარდა.

თორდიამ ასევე დაადასტურა აუდიტის სამსახურში ხელფასების ზრდა, თუმცა, აღნიშნა, რომ როდესაც ნოდარ ხადური აუდიტის სამსახურში 131%-იან ზრდაზე საუბრობდა, მან 4 წლიან მონაცემებზე ისაუბრა, აუდიტის სამსახურს კი, სამინისტროების მიმართ 1 წლიანი ანგარიში ჰქონდა გამოქვეყნებული.