საქართველოს საგარეო საქმეთა მინისტრის, ვიცე-პრემიერის გიორგი კვირიკაშვილის განცხადებით, მომდევნო წლის პირველ ნახევარში საქართველოს ლატვიის პრეზიდენტი რაიმონდს ვეიონისი ეწვევა.
ამის შესახებ გიორგი კვირიკაშვილმა საქართველოში ვიზიტად მყოფი ლატვიის საგარეო საქმეთა მინისტრ ედგარს რინკევიჩსთან შეხვედრის შემდეგ გამართულ ერთობლივ ბრიფინგზე განაცხადა.
როგორც გიორგი კვირიკაშვილმა აღნიშნა, კოლეგასთან შეხვედრაზე ისაუბრეს მაღალი დონის ვიზიტების მნიშვნელობაზე.
“მომდევნო წლის პირველ ნახევარში საქართველოს ლატვიის პრეზიდენტი ეწვევა. ეს არის ძალიან მნიშვნელოვანი ვიზიტი და ჩვენ ვეცდებით მაქსიმალურად კარგად მოვემზადოთ ამ ვიზიტისთვის. სავარაუდოდ, ამ ვიზიტამდე განხორციელდება ჩემი ვიზიტი ლატვიაში, ასევე გაიმართება ბიზნესფორუმი ლატვიაში”, – განაცხადა გიორგი კვირიკაშვილმა.
