ის დამოუკიდებლობა, რომელიც ჩვენ მოვიპოვეთ, უნდა ვაქციოთ თავისუფლებად, – ამის შესახებ საქართველოს პრეზიდენტმა გიორგი მარგველაშვილმა თავისუფლების მოედანზე განაცხადა , სადაც ქვეყნის მოსახლეობას ახალი, 2016 წელი მიულოცა. ქვეყნის პირველი პირი საახალწლო გალა-კონცერტს შეუერთდა და საქართველოს მოქალაქეებს სცენიდან მიმართა.
“გილოცავთ. ძალიან მიხარია, რომ დღეს აქ ვარ, თქვენთან ერთად ვარ და აქედან ვულოცავ მთელ საქართველოს. ძალიან მინდა მომავალი წელი იყოს ბედნიერების, დღეგრძელობის, გამარჯვების წელი. მომავალ წელს არის ახალი, დამოუკიდებელი საქართველოს 25 წლისთავი. ამ 25 წლის განმავლობაში ჩვენმა თაობამ და ჩვენი მამების თაობამ ძალიან ბევრი შეძლო – შეძლო ის, რომ მოიტანა დღევანდელი საქართველო, გადაარჩინა თავისი ოჯახები. ყველას შეგვეცვალა ცხოვრება – როგორ ვცხოვრობდით, მაგრამ მოვიტანეთ საქართველო, ქართული ღირებულებები და დღეს, როდესაც აქ თქვენთან ერთად, ქართული სიმღერის ფონზე ჩვენ ახალ წელს ვზეიმობთ, ვზეიმობთ ახალ, დამოუკიდებელ, ძლიერ საქართველოს და მომავალში ჩვენ ერთად გადავდგამთ ძალიან ძლიერ ნაბიჯებს იმ სიყვარულით, რასაც მე დღეს აქ თქვენგან ვგრძნობ, იმ ერთობით და ერთმანეთის გატანით, რასაც თქვენგან ვგრძნობ. მინდა გითხრათ, რომ ის დამოუკიდებლობა, რომელიც ჩვენ მოვიპოვეთ, უნდა ვაქციოთ თავისუფლებად”, – განაცხადა პრეზიდენტმა.
გიორგი მარგველაშვილის განმარტებით, თავისუფლება ნიშნავს გავხადოთ საქართველო ისეთი, როგორზეც ჩვენი წინაპრები ოცნებოდნენ.
“თავისუფლება ნიშნავს ვიყოთ ისეთები, როგორებიც ვართ – ისეთი ნიჭიერები, როგორებიც ვართ, ისეთი განსაკუთრებულები, როგორებიც ვართ. თავისუფლება ნიშნავს, რომ დავივიწყოთ ის შუღლი და შეცდომები, რომლებიც გვქონდა, თავისუფლება ნიშნავს გვიყვარდეს ერთმანეთი. თავისუფლება ნიშნავს გავხადოთ საქართველო ნამდვილად ისეთი, როგორზეც ჩვენი წინაპრები ოცნებოდნენ და დღეს ჩვენ ამ ეპოქის, ამ ახალი ნაბიჯის დასაწყისს ვზეიმობთ. ძალიან მიყვარხართ. მიყვარს, რომ ერთად ვართ დღეს, მიყვარს, რომ ვზეიმობთ დღეს, მიყვარს, რომ ის განსაკუთრებული ნიჭიერება, რაც ჩვენშია, დღეს აქ ვლინდება. მთელ საქართველოს მინდა მოვულოცო – სულ ნახევარი საათის წინ ვესაუბრე ჯარისკაცებს ქვეყნის გარეთ და ქვეყნის შიგნით. მინდა მათგან დავიწყო ეს მილოცვა, იმიტომ რომ ისინი იცავენ ჩვენ სახელმწიფოს. მე მინდა მივულოცო ჩვენ არაჩვეულებრივ თანამემამულეებსაც, რომლებიც ქვეყნის გარეთ არიან – თქვენ განსაკუთრებით გვენატრებით და გვიყვარხართ. მინდა მივულოცო ასევე იმ თანამემამულეებს, რომლებიც ოკუპირებულ ტერიტორიებზე იმყოფებიან და ვუთხრა, რომ ჩვენ მომავალი ერთად გვაქვს. მინდა თქვენ მოგილოცოთ, ჩვენო მომავალო თაობავ, ის ვინც გადაიბარებს ამ ქვეყნის მართვას და წარმართავს მომავალს. დიდი სიყვარულით გილოცავთ. თქვენთან ერთად ვარ და მუდმივად თქვენთან ერთად ვიქნები. გილოცავთ ახალ წელს”, – მიმართა პრეზიდენტმა თავისუფლების მოედანზე შეკრებილ მოქალაქეებს.
