ჯანდაცვის სამინისტრო მოსახლეობას გრიპის ვირუსის მართვის სპეციალური რეკომენდაციით მიმართავს და მოუწოდებს, პირველი სიპმტომების აღმოჩენისთანავე მიმართონ ექიმს, განსაკუთრებული სიფრთხილე გამოიჩინონ ორსულებმა და ქრონიკული დაავადებების მქონე პირებმა, არ დაუშვან გრიპის სიმპტომების მქონე პირები, როგორც სასწავლო, ისე სამუშაო გარემოში და მკაცრად დაიცვან ხელების ჰიგიენის წესები. როგორც “თბილისი თაიმსს” სამინისტროდან ნაცნობეს, შრომის, ჯანმრთელობისა და სოციალური დაცვის სამინისტრო განაგრძობს პრევენციულ ღონისძიებებს. ამ დრომდე, დედაქალაქის ყველა რაიონში მოქმედებს საოჯახო მედიცინის სადღეღამისო ცენტრები, სადაც სამედიცინო მომსახურება ერთი კვირის განმავლობაში 5070 პაციენტს გაეწია. დღეიდან, სასწავლო პროცესი აღდგა ყველა იმ სკოლაში, სადაც დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ გაცემული რეკომენდაციის მიხედვით შეჩერებული იყო. თუმცა რეკომენდაცია ძალაში რჩება და იმ სასწავლო დაწესებულებებში, სადაც გაცდენების რაოდენობა 20%-ს გადააჭარბებს, სასწავლო პროცესი სამი დღით უნდა შეწყდეს. სამინისტროს ცნობით, საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის ინფრომაციით, გრიპის ვირუსის გავრცელების ინტენსივობის მატება ბოლო დღეების განმავლობაში არ შეინიშნება. ჯერ ისევ რთული რჩება ვითარება რამდენიმე ქვეყანაში. ეპიდემიოლოგიური ზღვარი გადალახულია უკრაინის 18 ოლქში და რუსეთის უმეტეს რეგიონში, სადაც გარდაცვალების 126 შემთხვევა დაფიქსირდა. გრიპის ვირუსით 57 ადამიანია გარდაცვლილი თურქეთში, ხოლო 160 შემთხვევაა აღრიცხული უკრაინაში. სომხეთში ლაბორატორიულად დადასტურებული გრიპის ინფექციით გარდაცვალების 18 შემთხვევა დაფიქსირდა, სტაციონარულ მკურნალობას კი 700 პაციენტი გადის.
