თბილისის ძველი, ისტორიული უბანი ახალ ენერგიას იძენს – მასშტაბური პროექტი „ახალი ტფილისი“, რომელიც აღმაშენებლის გამზირის რესტავრაცია-რეაბილიტაციას გულისხმობს, დღეს დაიწყო.
პრეზენტაციას საქართველოს პრემიერ-მინისტრი გიორგი კვირიკაშვილი დაესწრო.
სარეაბილიტაციო სამუშაოებში, რომელიც ახალი მიდგომით განხორციელდება, პრაქტიკულად ყველა შესაბამისი დარგის 200-მდე სპეციალისტი ჩაერთვება – არქიტექტორები, ისტორიკოსები, ურბანისტები, ინჟინრები, ხელოვნებათმცოდნეები, რესტავრატორები, დეველოპერები.
პრემიერმა მათ პროექტში მონაწილეობისთვის მადლობა გადაუხადა და აღნიშნა, რომ მთავრობის მიზანი, ეკონომიკის განვითარებასთან ერთად, სწორედ ისტორიული მემკვიდრეობის შენარჩუნება და მოვლა-პატრონობაა.
“თბილისი სრულიად განსაკუთრებული ქალაქია, განსაკუთრებული ადგილმდებარეობით, არქიტექტურით და ადამიანებით და ჩვენი ვალია, წინაპრების დანატოვარი უნიკალური ქალაქი განვაახლოთ, განვავითაროთ ტურიზმი, ეკონომიკა, რათა თბილისის მცხოვრებლებისთვის ქალაქი გახდეს იმედისმომცემი, ტურისტებისთვის საინტერესო და ახალი სამუშაო ადგილები შეიქმნას”, – განაცხადა პრემიერ-მინისტრმა.
გიორგი კვირიკაშვილის თქმით, ქალაქი ისე უნდა განვითარდეს, რომ შენარჩუნებული იყოს ისტორიული მემკვიდრეობა, მაგრამ ამავე დროს მან შეიძინოს ახალი ენერგია ეკონომიკური განვითარებისთვის.
პრემიერის შეფასებით, ძალიან მნიშვნელოვანია, რომ პროექტით იქმნება ახალი რეკრეაციული სივრცეები, ბაღები, პარკები, რაც აუცილებელია თანამოქალაქეების დასვენებისთვის და რაიონში ეკოლოგიური მდგომარეობის გასაუმჯობესებლად.
“პროექტი გამოირჩევა ახალი მიდგომებით – ჩვენ არა მხოლოდ ფასადებს აღვადგენთ, არამედ შევდივართ ეზოებში, მთლიანად განვაახლებთ საკომუნიკაციო ინფრასტრუქტურას, რაც მნიშვნელოვნად გაზრდის უძრავი ქონების ფასებს თბილისში. თბილისი ყოველთვის გამოირჩეოდა იმით, რომ იყო სხვადასხვა ერის, სხვადასხვა კულტურის ხალხის ერთად ცხოვრების ადგილი. ჩვენ ეს სიმდიდრე უნდა შევინარჩუნოთ და მომავალში კიდევ უფრო განვავითაროთ. მნიშვნელოვანია, პროექტი დასრულდეს იმ ვადებში, რომელზეც არის საუბარი – 2016 წლის ბოლომდე”, – განაცხადა პრემიერმა და აღნიშნა, რომ წლის ბოლოს თბილისს ექნება განახლებული რაიონი საფეხმავლო სივრცეებით, კაფე-ბარებით და ახალი ბაღებით, რომელიც პროექტის მნიშვნელოვანი განმასხვავებელი ნიშანია.
ასევე, ქალაქს შეემატება ახალი ტურისტული მარშრუტები და ყველა შენობაზე, რომლის რეაბილიტაცია დაიწყება, გამოქვეყნდება კალენდარი, სამუშაოების დასრულების ვადების მითითებით.
პრემიერმა დღევანდელი დღე ყველას მიულოცა და თბილისს – განვითარება, ხოლო დედაქალაქის მერიას პროექტის წარმატებით განხორციელება უსურვა.
“ჩვენ ყველამ ერთად უნდა ავაგუგუნოთ ქვეყანა და ეს პროცესი დღეს, აღმაშენებლის გამზირზე იწყება”, – აღნიშნა პრემიერ-მინისტრმა.
