საქართველოს მთავრობა სამთო-სათხილამურო კურორტ “თეთნულდზე” სასტუმროების მიმართულების განვითარებას გეგმავს. როგორც საქართველოს ეკონომიკისა და მდგრადი განვითარების მინისტრმა დიმიტრი ქუმსიშვილმა კურორტ “თეთნულდის” გახსნის შემდეგ ჟურნალისტებს განუცხადა, კურორტზე ადმინისტრაციულ შენობაში პირველი სასტუმრო და პირველი რესტორანი განთავსდება. განაშენიანების გენერალური გეგმის გაკეთების შემდეგ კი ადგილობრივ მოსახლეობასთან და კერძო სექტორთან ერთად სასტუმროების მიმართულების განვითარება იგეგმება.
პრემიერის განკარგულებით, პროცესში საპარტნიორო ფონდიც ჩაერთვება.
“მინდა მივულოცო ყველას, ვინც არის მოთხილამურე, ვისაც უყვარს მთა, დღეს საქართველოში კიდევ ერთი ახალი სათხილამურო კურორტი “თეთნულდი” დაგვემატა. ჩვენ გავხსენით პირველი ნაწილი, ეს არის პირველი საბაგირო 3,5-კილომეტრიანი სასრიალო ტრასით, თუმცა წლის ბოლომდე დავამატებთ კიდევ 3 საბაგიროს. ჩვენ აქ გვექნება საქართველოში ყველაზე დიდი – 1,7 კილომეტრიანი ვერტიკალური ვარდნა. “თეთნულდის” სათხილამურო ტრასა ამიერკავკასიაში ყველაზე გრძელი 9,5 კმ იქნება. საბოლოო ჯამში ჩვენ აქ მივიღებთ საკმაოდ მაღალი დონის ევროპულ სათხილამურო კურორტს, რომელიც რა თქმა უნდა, იქნება არა მხოლოდ ქართველებისთვის, არამედ ევროპისთვის. ეს არის სწორედ ის სათხილამურო კურორტი, რომელმაც კიდევ ერთხელ უნდა გაამყაროს და განამტკიცოს ჩვენი ქვეყნის, როგორც სათხილამურო და ზამთრის ტურიზმის მქონე ქვეყნის ადგილი მსოფლიოს რუკაზე”, – განაცხადა დიმიტრი ქუმსიშვილმა.
მისივე თქმით, კურორტის პოპულარიზაციის მიზნით ტურიზმის ეროვნული ადმინისტრაცია ძალ-ღონეს არ დაიშურებს. ადგილზე მოეწყობა პრესტურები და ტურისტული კომპანიების ვიზიტები.
ამასთან, დღეიდან მესტიიდან თეთნულდის მიმართულებით დაინიშნა უფასო ავტობუსები, რომელიც საათში ერთხელ იმოძრავებენ. სამთო-სათხილამურო კურორტი “თეთნულდი” დღეს საქართველოს პრემიერ-მინისტრმა გიორგი კვირიკაშვილმა მინისტრთა კაბინეტის წევრებთან ერთად გახსნა.
