პრემიერ-მინისტრ გიორგი კვირიკაშვილის განცხადებით, კოალიციაში პარტიების წინასწაარჩევნო კამპანიების დამოუკიდებულად წარმოებაზე, კონსულტაციები დიდი ხნის განმავლობაში მიმდინარეობდა.“მოგეხსენებათ, “ქართულ ოცნებაში” დიდი ხანია, მიმდინარეობდა კონსულტაციები. განსაკუთრებით, ბოლო პერიოდში აქტიური იყო კონსულტაციები არჩევნებზე გასვლის ფორმასთან დაკავშირებით. ვთვლით, რომ ეს არის მისაღები ფორმა, რომ “ქართული ოცნება” გავიდეს დამოუკიდებლად არჩევნებში. შესაბამისად, გაკეთდა განცხადება “რესპუბლიკური პარტიის” მხრიდანაც”, – აღნიშნა პრემიერმა პარლამენტის თავმჯდოამრესთან შეხვედრის შემდეგ. მისი თქმით, არჩევნების შემდეგ თანამშრომლობის ფორმებზე ალბათ საუბარი ნაადრევია. “საჭიროა, რომ საქართველოს მოსახლეობამ გააკეთოს შესაბამისი არჩევანი. არჩევნებში დამოუკიდებლად პარტიების მონაწილეობა ჩვეულებრივი საერთაშორისო პრაქტიკაა. ამაში განსაკუთრებული არაფერია. ვთვლით, რომ ეს არის ნორმალური, როდესაც არჩევნებში პარტიები დამოუკიდებლად გავალთ. არჩევნების შემდეგ, ხდება ასე თუ ისე, გარკვეული კოალიციების შექმნა. 2012 წელს, იყო სრულიად სხვა რეალობა, დღეს – სხვაა. 2012 წელს, იყო არჩევნები, როდესაც კოალიციის ფორმით გავიდა “ქართული იცნება”. წინასაარჩევნო პროცესი მაშინ ძალიან მძიმე იყო. დღეს, რეალობა სხვანაირია. დემოკრატიული განვითარება ამ პერიოდში მნიშვნელოვან ცვლილებებს განაპირობებს”, – განაცხადა კვირიკაშვილმა.
