,,პირიმზე პლაზაში“ ,,ლიბერალ დემოკრატების” პარტიის სადამფუძნებლო ყრილობა გაიმართა.
ყრილობაზე პარტიის ახალი გამგეობა და ახალი თავმჯდომარე აირჩა. აგრეთვე, ,,ლიბერალ-დემოკრატებმა“ შეკრებილ საზოგადოებას გუნდის თითოეული წევრი, ორგანიზაციის ხედვა და მიზნები გააცნეს. პარტიას ოფიციალური სახე მიეცა და, უკვე დამტკიცებული სტრუქტურით, საქართველოს კანონმდებლობის გათვალისწინებით, გააგრძელებს ბრძოლას.
ყრილობას სიტყვით პარტიის ლიდერებმა – მუხრან ბურჭულაძემ, რევაზ კემულარიამ და თამაზ კერძევაძემ მიმართეს.
მოწვეულ სტუმრებს შორის საქართველოს პირველი უზენაესი საბჭოს თავმჯდომარის მოადგილე – ნემო ბურჭულაძეც იმყოფებოდა.
,,„ლიბერალ დემოკრატები“ იქნება პირველი საკადრო პარტია საქართველოში, რომელიც მუდამ მოამარაგებს ხელისუფლებებს კვალიფიციური კადრით. ჩვენს გუნდში არ განიხილება მოქალაქეთა სქესი ან ასაკი და სწორედ ამიტომაა ის ერთიანი და ეფექტური ორგანიზმი.
საქართველოს სჭირდება გარდატეხები ეკონომიკისა და დემოკრატიის თავსაზრისით, მითუმეტეს, რომ ახლა უპრეცედენტო მხარდაჭერა გვაქვს და ყველაფერი მხოლოდ ჩვენს ნაბიჯებზეა დამოკიდებული. თუმცა თუ ვინმეს ჩვენი ქვეყნის ევროპულ მომავალში ეჭვი ეპარება, შემიძლია ვუთხრა, რომ ამ ქვეყნის შვილებმა უკანასკნელი გავიღეთ საერთო ღირებულებებისთვის, თავისუფლებისა და დემოკრატიისთვის და საქართველო იმსახურებს გაცილებით მეტს. ჩვენმა მოქალაქემ არათუ უნდა იმოგზაუროს ევროპაში არამედ უნდა იგრძნოს თავი ამ ოჯახის სრულფასოვან წევრად, რადგან ეს არის საქართველო და ეს არის ევროპა!“ – ამ სიტყვით მიმართა ყრილობაზე მოწვეულ სტუმრებსა და მხარდამჭერებს პარტია ,,ლიბერალ დემოკრატების“ ლიდერმა – მუხრან ბურჭულაძემ.
ნატალია ჯალაღონია
