ბუქარესტში ოფიციალური ვიზიტი საქართველოს თავდაცვის მინისტრმა თინათინ ხიდაშელმა რუმინელ კოლეგასთან მიჰეა მოტოჩთან ორმხრივი შეხვედრით დაიწყო. შეხვედრის დასაწყისში თინათინ ხიდაშელმა კოლეგას პოლიტიკური მხარდაჭერისა და უელსის სამიტზე საქართველოსთვის მინიჭებული ნატო-საქართველოს არსებითი პაკეტის იმპლემენტაციაში დახმარებისთვის მადლობა გადაუხადა. შეხვედრაზე განხილული საკითხებიდან დიდი ყურადღება დაეთმო ნატო-საქართველოს თანამშრომლობას. ყურადღება გამახვილდა ნატო-საქართველოს არსებითი პაკეტის იმპლემენტაციის პროცესზე. თინათინ ხიდაშელმა იმედი გამოთქვა, რომ ვარშავაში დაგეგმილ ნატოს სამიტზე მოკავშირეები დეკემბერში გამართულ ნატოს საგარეო მინისტერიალზე მიღებული ღია კარის პოლიტიკის ერთგული დარჩებიან და საქართველოსთან მჭიდროდ ითანამშრომლობენ.
მინისტრებმა თავდაცვის სფეროში ორმხრივი თანამშრომლობის საკითხებზეც ისაუბრეს. ყურადღება გამახვილდა ერთობლივ სამხედრო სწავლებებში ქართველი და რუმინელი სამხედროების მონაწილეობასა და სამხედრო განათლების სფეროში თანამშრომლობაზე.
შეხვედრაზე განხილვის თემები იყო ასევე, რეგიონში არსებული უსაფრთხოების გარემო, მონაწილეობა საერთაშორისო მისიებში და თანამშრომლობა ევროკავშირთან. თინათინ ხიდაშელმა ხაზგასმით აღნიშნა, რომ საქართველო დიდ ყურადღებას უთმობს ევროკავშირის კრიზისების მართვის ოპერაციებში მონაწილეობას. თინათინ ხიდაშელმა ხაზგასმით გამოყო რუმინელი დამკვირვებლების მონაწილეობა ევროკავშირის სადამკვირვებლო მისიაში. მისი თქმით, მისია საქართველოს უსაფრთხოებისა და სტაბილურობის მთავარ გარანტად რჩება.
ორმხრივი შეხვედრის დასრულების შემდეგ რუმინეთისა და საქართველოს თავდაცვის მინისტრმა მედიისთვის ერთობლივი განცხადებები გააკეთეს.
„საქართველო შავი ზღვის რეგიონში რუმინეთის მნიშვნელოვანი პარტნიორია, ასევე ერთ-ერთი ყველაზე მნიშვნელოვანი პარტნიორია ნატოსა და ევროკავშირისთვის. რუმინეთი აქტიურად უჭერს მხარს საქართველოს ევრო-ატლანტიკურ სტრუქტურებში ინტეგრაციას. შევთანხმდით, რომ კიდევ უფრო გავაფართოვოთ ორმხრივი ურთიერთობები. თავდაცვის სფეროში ახალი შესაძლებლობები დავსახეთ, განსაკუთრებით ვგეგმავთ თანამშრომლობის გაფართოებას სამხედრო განათლების სფეროში, თავდაცვით დაზვერვაში, რასაც დღევანდელ მსოფლიოში მნიშვნელოვანი ადგილი უჭირავს, ვინაიდან ინფორმაციის სათანადო გაცვლა ყველა ქვეყნისთვის სარგებლის მომტანია. ვგეგმავთ თანამშრომლობის გაღრმავებას სპეციალური ოპერაციებისა და სახმელეთო ძალების მიმართულებით, ასევე ერთობლივი სწავლებებისა და წვრთნების ჩატარებას.
შეხვედრაზე რეგიონული უსაფრთხოების კუთხით ბოლოდროს განვითარებულ მოვლენებსა და შავი ზღვის რეგიონში თანამშრომლობის ინიციატივებზე ვისაუბრეთ. შევთანხმდით, რომ ნატოსთვის, სტრატეგიული თვალსაზრისიდან გამომდინარე, მნიშვნელოვანია შავი ზღვის რეგიონი.
დღევანდელ შეხვედრაზე განსაკუთრებული ყურადღება გამახვილდა ნატო-საქართველოს პარტნიორობაზე. აღინიშნა, რომ პარტნიორობის სამომავლო გაფართოება ვარშავაში დაგეგმილ სამიტზე განხილვის თემა უნდა იყოს. რუმინეთი ნატოს ღია კარის პოლიტიკის ერთ-ერთი მნიშვნელოვანი მხარდამჭერია. უკვე სამი წელია, რაც რუმინეთის საელჩო თბილისში სამეკავშირეო როლს ასრულებს ალიანსსა და საქართველოს ხელისუფლებას შორის, ამავე დროს, მხარს უჭერს საქართველოს თავდაცვის სფეროში მიმდინარე რეფორმებს.
დიდად ვაფასებთ საქართველოს მნიშვნელოვან კონტრიბუციას ნატოს ეგიდით წარმოებულ მისიებში, როგორიცაა „მტკიცე მხარდაჭერის“ მისია და სწრაფი რეაგირების ძალებში ჩართვა,“ – განაცხადა მიჰეა მოტოჩმა.
„ჩვენ სამაგალითო თანამშრომლობა გაგვაჩნია ორმხრივ, რეგიონულ და საერთაშორისო დონეზე. გვჯერა, რომ ამ მაგალითს აიღებენ სხვა ქვეყნები, რათა ვუზრუნველყოთ ყველაზე მნიშვნელოვანი – მშვიდობა; ვიბრძოლოთ უკეთესი უსაფრთხოებისთვის, უფრო უსაფრთხო მსოფლიოსთვის. მადლობას გიხდით შესაძლებლობისთვის, რომელსაც რუმინეთი ქართველ ჯარისკაცებსა და ოფიცრებს სხვადასხვა სწავლებაში, პროგრამაში მონაწილეობას სთავაზობს. მეორეს მხრივ, ჩვენ მოხარულები ვართ, რომ რუმინელი სამხედროები და ოფიცრები საქართველოში გამართულ ორმხრივ თუ საერთაშორისო სწავლებებში, ჩვენს საწვრთნელ ცენტრებში ნატოს ეგიდით მიმდინარე პროგრამებში იღებენ მონაწილეობას.
ჩვენ ვცხოვრობთ ყოველდღიურად ცვალებად სამყაროში. გასულ კვირას ბრიუსელში განვითარებულმა მოვლენებმა, ანკარაში, პარიზსა და მსოფლიოს სხვა ნაწილებში განხორციელებულმა ტერორისტულმა აქტებმა დაამტკიცა, რომ საჭიროა კიდევ უფრო მეტი თანამშრომლობა, მეტი პარტნიორობა, საჭიროა საზღვრების გახსნა თავისუფლებისთვის და ისეთი ქვეყნების მიღება, რომლებიც საერთო უსაფრთოების მონაწილენი არიან. საერთაშორისო მისიებში ჩვენი კონტრიბუციით გვჯერა, რომ საერთო ბრძოლითა და ერთობლივი ძალისხმევით მსოფლიოს მშვიდობა და უსაფრთხოება მიიღწევა.
მტკიცედ გვწამს, რომ თუკი საქართველოს, როგორც ევროპული ოჯახის ნაწილს, კიდევ უფრო მეტი შესაძლებლობა მიეცემა, თუ საქართველოსთვის ნატოს კარი ღიაა, კიდევ მეტი კონტრიბუციის გაღება და შეთავაზება შეგვიძლია მსოფლიო თანამეგობრობისთვის. შავი ზღვის რეგიონის უსაფრთხოებას, რომელიც ჩვენი საერთო სივრცეა, საფრთხე ემუქრება. ჩვენ შეგვიძლია ერთობლივი ბრძოლა და მუშაობა შავი ზღვის უსაფრთხოებისთვის. სწორედ ამ რეგიონში, ჩვენ მეზობლები ვართ, სწორედ აქ ვხედავთ მეტ შესაძლებლობებს კიდევ უფრო წარმატებული თანამშორმლობისთვის რუმინეთთან, ბულგარეთთან, თურქეთთან და ნატოს წევრ სხვა ქვეყნებთან. ჩვენ ბევრს ვმუშაობთ, მომავალს ძალიან ოპტიმისტურად ვუყურებთ, რომელიც სწორედ რუმინეთთან თანამშორმლობასა და მეგობრობას ეფუძვნება. მადლობა ამ ყველაფრისთვის,“ – განაცხადა თინათინ ხიდაშელმა რუმინელ კოლეგასთან შეხვედრის დასრულების შემდეგ გამართულ ბრიფინგზე.
დღესვე რუმინეთის ეროვნულ თავდაცვის სამინისტროში საქართველოსა და რუმინეთის თავდაცვის უწყებებს შორის 2016 წლის ორმხრივი თანამშრომლობის გეგმას მოეწერა ხელი.
